الماتىدا تۇرعىن ءۇي كەشەنىنەن ءورت شىقتى

تجد وكىلدەرى ساعات 23:58-دە وقيعا ورنىنا كەلگەن كەزدە تۇرعىن ءۇي كەشەنىنىڭ 6-7-قاباتتاردا جانە 17-18-قاباتتارىنداعى ەكى بلوكتا دا ءورت شىققانى انىقتاعان.

«وقيعا ورنىندا جەدەل شتاب قۇرىلدى, شىعىس جانە باتىس جاعىنان گاز-تۇتىننەن قورعاۋ قىزمەتىنەن جاۋىنگەرلىك ۋچاسكەلەر قۇرىلدى, بۇگىندە 120-دان استام ادام ەۆاكۋاتسيالاندى, 20 ادام قۇتقارىلدى, ءورت وقپاندارى ەنگىزىلدى, گيدرانتتارعا اۆتوتسيستەرنالار قوسىلدى. باسپالداق تورلارىنداعى ءتۇتىندى ازايتۋ ءۇشىن جويۋ ءاۆتوموبيلى جۇمىلدىرىلدى. ەۆاكۋاتسيالانعانداردىڭ سانى وزگەرىپ جاتىر», دەدى تجد وكىلدەرى. 

الماتى تجد اقپاراتى بويىنشا, التىن بۇلاق-2 تۇرعىن ءۇي كەشەنىندەگى ءورت 01.45-تە سوندىرىلگەن.

«11 جەلتوقساندا ساعات 23:58-دە الماتى تجد كۇشتەرى مەن قۇرالدارى جوعارى شاقىرۋ بويىنشا المالى اۋدانى, برۋسيلوۆسكي كوشەسى, 167-گە شىقتى. ءورت ءسوندىرۋ بولىمشەلەرى 00:08-دە جەتتى, ولار كەلگەندە «التىن بۇلاق-2» تۇرعىن ءۇي كەشەنىندەگى 18 قاباتتى تۇرعىن ءۇيىنىڭ ەكى بلوگىندا كابەلدىك شاحتالار جانعانى انىقتالدى. ەۆاكۋاتسيا جولدارىندا تەمپەراتۋرا جوعارىلاپ, قويۋ ءتۇتىن پايدا بولىپ, تۇرعىنداردىڭ ءومىرى مەن دەنساۋلىعىنا قاۋىپ ءتوندى. قۇتقارۋ جۇمىستارىن جۇرگىزۋگە بارلىق كۇش مەن قۇرال دەرەۋ جۇمىلدى. سونىمەن قاتار داۋىس زورايتقىش بايلانىس ارقىلى تۇرعىندارعا ەسىكتەرىن تىعىز جاۋىپ, باسپالداققا شىقپاۋ كەرەگى ايتىلدى. وقيعا ورنىندا شىعىس جانە باتىس جاعىنان ءورت ءسوندىرۋ ۋچاسكەلەرى قۇرىلدى. قۇتقارۋ جۇمىستارىن جۇرگىزۋ بارىسىندا گاز-تۇتىننەن قورعاۋ قىزمەتى 177 ادامدى ەۆاكۋاتسيالادى, ونىڭ ىشىندە التى بالا بار, 27 ادام قۇتقارىلدى, ونىڭ ىشىندە بەس بالا جانە ەكى ءۇي مىسىعى بار. ءورتتى جويۋ ءۇشىن ءورت وقپاندارى قويىلدى, اۆتوتسيستەرنالار گيدرانتتارعا ورناتىلدى. باسپالداقتاعى ءتۇتىندى ازايتۋ ءۇشىن ءتۇتىن شىعاراتىن ءورت ءسوندىرۋ اۆتوموبيلدەرى ىسكە قوسىلدى. 85 قىزمەتكەر, 23 تەحنيكا جۇمىلدى. قازا بولعاندار جوق», دەپ حابارلادى ۆەدومستۆو وكىلدەرى.