دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس كوروناۆيرۋس پاندەمياسىنىڭ نەگە سوزىلىپ كەتكەنىن ايتتى, دەپ حابارلايدى Egemen.kz.
پاندەمياعا قارسى ارەكەت ەتۋ تاقىرىبىنداعى دارىستە ددسۇ باسشىسى 8 جەلتوقساندا «COVID-19-عا قارسى ۆاكتسينا قولدانىلعانىنا» 1 جىل بولعانىن ەسكە سالدى. ونىڭ ايتۋىنشا, بارلىعى ءبىر جىلدان كەيىن پاندەميا اياقتالاتىنىنا سەندى, سوعان ۇمىتتەندى. الايدا پاندەميانى اياقتاۋ ۇشىن ۆاكتسينا, دياگنوستيكالىق جانە ەمدىك قۇرالدار, باسقا دا ماڭىزدى قۇرالدار تەڭ بولىنبەگەندىكتەن, پاندەميا كۇتكەننەن الدەقايدا ۇزاق ۋاقىتقا سوزىلىپ كەتكەن.
«وميكرون شتامىنىڭ پايدا بولۋى جەتىستىكتەرىمىزگە نۇقسان كەلتىرەدى. جاڭا ەمدەۋ ادىستەرىن ازىرلەۋ COVID-19-دىڭ الدىن الۋعا ايتارلىقتاي اسەر ەتۋى مۇمكىن. بىراق ميلليونداعان ادامدى ۆاكتسينادان ايىرعان جاڭا قۇرالدارعا ادىلەتسىز تۇردە قول جەتكىزە المايمىز», دەپ تولىقتىردى ددسۇ باسشىسى.
گەبرەيەسۋس ەل ۇكىمەتتەرىن جاڭا وميكرون شتامىنا قارسى ۇلتتىق پاندەميا جوسپارلارىن قايتا قاراۋعا, سونداي-اق, اۋرۋدىڭ تارالۋىن ازايتۋ جانە ۆاكتسيناتسيامەن قامتۋدى جەدەلدەتۋ بويىنشا شارالاردى كۇشەيتۋگە شاقىردى.
«تاعى قانشا ادامنىڭ ءومىرىن جوعالتاتىنىمىز بۇكىل الەم بويىنشا ۆاكتسيناعا, سىناققا جانە ەمدەۋگە ءادىل تۇردە قولجەتىمدىلىكتى قانشالىقتى جىلدام قامتاماسىز ەتە الاتىنىمىزعا بايلانىستى», دەپ قورىتىندىلادى ول.