ەلباسى نۇرسۇلتان نازارباەۆ قىرعىزستان پرەزيدەنتى اكىمشىلىگىنىڭ باسشىسى – مينيسترلەر كابينەتىنىڭ توراعاسى اقىلبەك جاپاروۆتى قابىلدادى, دەپ حابارلايدى Egemen.kz.
كەزدەسۋدە نۇرسۇلتان نازارباەۆ قازاقستان مەن قىرعىزستاننىڭ باۋىرلاس حالىقتارىنىڭ تاريحي جاقىندىعىن اتاپ ءوتتى. قازاقستاننىڭ تۇڭعىش پرەزيدەنتى ەكى مەملەكەت اراسىنداعى مادەني-گۋمانيتارلىق بايلانىستى نىعايتا ءتۇسۋدىڭ ماڭىزدىلىعىنا نازار اۋداردى.
وسى ورايدا ەلباسى قىرعىزستان جاستارىنىڭ ەلىمىزدەگى جوعارى وقۋ ورىندارىندا ءبىلىم الۋى ءۇشىن گرانت ءبولۋ مۇمكىندىگى تۋرالى ايتتى. قىرعىز رەسپۋبليكاسى مينيسترلەر كابينەتىنىڭ توراعاسى نۇرسۇلتان نازارباەۆقا قىرعىزستان حالقىنا ءاردايىم قولداۋ كورسەتىپ كەلە جاتقانى ءۇشىن العىسىن ءبىلدىرىپ, قىرعىز رەسپۋبليكاسىنىڭ پرەزيدەنتى سادىر جاپاروۆتىڭ ىزگى تىلەگىن جەتكىزدى.
سونىمەن قاتار اقىلبەك جاپاروۆ تۇڭعىش پرەزيدەنتتىڭ باسشىلىعىمەن تاۋەلسىزدىك جىلدارىندا قازاقستاننىڭ قول جەتكىزگەن تابىستارىنا ەرەكشە توقتالىپ, ەلباسىنىڭ ەكى ەل حالىقتارى اراسىنداعى تاتۋ كورشىلىك قارىم-قاتىناستى نىعايتۋعا قوسقان زور ۇلەسىن اتاپ ءوتتى.