شىمكەنت قالاسىنىڭ اكىمى مۇرات ايتەنوۆ بۇگىن قالالىق ءماسليحاتتىڭ كەزەكتى ون ءبىرىنشى سەسسياسىندا دەپۋتاتتار الدىندا وزىنە جۇكتەلگەن مىندەتتەر مەن فۋنكتسيالارىنىڭ ورىندالۋى جونىندە ەسەپ بەردى, دەپ حابارلايدى Egemen.kz شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
قالا باسشىسى دەپۋتاتتىق كورپۋس وكىلدەرىن كەلە جاتقان مەملەكەتتىك مەرەكەلەرمەن قۇتتىقتاپ, بۇگىنگى تابىستارىمىزدىڭ باستاۋىندا تاۋەلسىزدىك قۇندىلىقتارى, تۇڭعىش پرەزيدەنت جۇرگىزگەن پاراساتتى ساياسات جاتقاندىعىن اتاپ ءوتتى.
بيىلعى جىلدىڭ 10 ايىندا اتقارىلعان جۇمىستاردى بايانداعان قالا باسشىسى, بارلىق سالالاردا وڭ دامۋ ديناميكاسى ساقتالعانىن جەتكىزدى.
«ونەركاسىپ ءونىم كولەمىنىڭ يندەكسى - 6,7%-عا, اۋىل شارۋاشىلىعى - 1,2%-عا, ينۆەستيتسيا كولەمى - 41,2%-عا, قۇرىلىس جۇمىستارى - 11,8%-عا, پايدالانۋعا بەرىلگەن تۇرعىن ۇيلەر الاڭى - 23,7%-عا, بولشەك ساۋدا كولەمى - 9,6%-عا ارتتى. بۇل ستاتيستيكالىق دەرەكتەردىڭ ارتىندا قالانىڭ تىنىس-تىرشىلىگىنە ارنالعان ۇلكەن جۇمىس, تۇرعىنداردىڭ ءومىر ساپاسىن ارتتىرۋعا باعىتتالعان اۋقىمدى ىستەر بار.ءاربىر باستامامىزدىڭ يگىلىگىن حالىق سەزىنۋى قاجەت. وسى ماقساتتا قالانىڭ بەس جىلدىق دامۋ جوسپارى قابىلداندى, ول جۇيەلى تۇردە ىسكە اسىرىلۋدا», دەدى اكىم.
قالانىڭ يندۋستريالىق ايماقتارى ونەركاسىپ سالاسىنىڭ دامۋىنا سەرپىن بەردى. قازىرگى تاڭدا, ءتورت وندىرىستىك ايماقتا 8 مىڭنان استام جۇمىس ورنىمەن 118 كاسىپورىن اشىلعان. ەسەپتى كەزەڭدە 500-دەن استام جۇمىس ورنى مەن جاڭا 10 كاسىپورىن ىسكە قوسىلدى. ودان بولەك, قوسىمشا 2 يندۋستريالدى ايماق اشۋ جۇمىستارى باستالدى. ناتيجەسىندە الداعى 5 جىلدا ونەركاسىپ ءونىم كولەمىن 700 ملرد. تەڭگەدەن 960 ملرد. تەڭگەگە جەتكىزۋ جوسپارلانعان.
اۋىل شارۋاشىلىعىندا 29 مىڭ گەكتار جەرگە ەگىستىك ەگىلىپ, 85 مىڭ توننا ءونىم جينالدى. شارۋالاردى قولداۋدا 133 كاسىپكەرگە 2,6 ملرد. تەڭگەگە سۋبسيديا ءبولىندى. سونىمەن بىرگە 7,6 ملرد. تەڭگەگە 17 جوبا ىسكە اسىپ, 200-دەن استام جۇمىس ورنى اشىلدى.
ال قالاعا تارتىلعان ينۆەستيتسيا كولەمى وتكەن جىلدىڭ سايكەس كەزەڭىمەن سالىستىرعاندا 41,2 پايىزعا ارتىپ, 325 ملرد. تەڭگەدەن استى.
مەگاپوليس مارتەبەسىن العان ۋاقىتتان قالا بيۋدجەتىنىڭ كولەمى 4 ەسەگە ارتتى. بيىلعى جىلدىڭ باسىندا بەكىتىلگەن بيۋدجەت 388 ملرد. تەڭگە بولسا, قازىر 491 ملرد. تەڭگەگە جەتتى نەمەسە ءبىر جىلدىڭ ىشىندە قالا بيۋدجەتى 103 ملرد.تەڭگەگە ۇلعايدى. بيۋدجەتتىڭ 45 پايىزى الەۋمەتتىك سالاعا باعىتتالسا, 25 پايىزى – دامۋ جوبالارىن قۇرايدى.
بۇل كورسەتكىشتەردەن بولەك قالادا ءبىلىم, دەنساۋلىق ساقتاۋ, سپورت, مادەنيەت, جۇمىسپەن قامتۋ سەكىلدى باسقا سالالاردا دا جەتىستىكتەر بار.
«ەلباسى نۇرسۇلتان ءابىش ۇلى نازارباەۆ ۇسىنعان «ەلدىكتىڭ جەتى تۇعىرىندا» مەملەكەت تاۋەلسىزدىگى, ۇلت بولاشاعى باياندالىپ, الداعى جۇمىسىمىزدىڭ باعدارى بولىپ بەكىدى. سىزدەر حالىقتىڭ اماناتىن ارقالاعان وكىلسىزدەر. تۇرعىنداردىڭ تالاپ-تىلەگىن بيلىككە جەتكىزىپ, ولاردىڭ ءتيىمدى شەشىمىن تابۋىنا ۇلەس قوسىپ كەلەسىزدەر. بىرلەسە جۇمىس جۇرگىزۋىمىزدىڭ ناتيجەسىندە شىمكەنت تۇرعىندار ءۇشىن ءومىر ساپاسى لايىقتى, جايلى قالاعا اينالىپ كەلەدى», دەپ م.ايتەنوۆ ءوز ءسوزىن قورىتىندىلادى.
ءوز كەزەگىندە حالىق قالاۋلىلارى اتقارىلعان جۇمىستارعا وڭ باعاسىن بەرىپ, الدا تۇرعان ماقسات-مىندەتتەردى بىرلەسە جۇزەگە اسىرۋعا دايىن ەكەندىكتەرىن جەتكىزدى.