الماتىدا 30 قاراشا مەن 4 جەلتوقسان ارالىعىندا وتەتىن Iح حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى ءوز جۇمىسىن باستادى, دەپ جازادى Egemen.kz.
جىل سايىن وتەتىن كينو مەرەكەسىنىڭ نەگىزگى ماقساتى – ەۋروپا مەن ازيانىڭ جاس كينەماتوگرافيستەرى اراسىندا ىنتىماقتاستىق ورناتۋ, ولاردىڭ جۇمىسىن قولداۋ جانە ىلگەرىلەتۋ, ءتۇرلى جانرداعى كينوفيلمدەردى تۇسىرۋگە قىزىعۋشىلىعىن ارتتىرۋ. پاندەميا كەزىندەگى قيىندىققا قاراماستان, حالىقارالىق ءىرى جوبانى جۇزەگە اسىرۋداعى ساباقتاستىقتى ءۇزىپ الماي, قازىلار القاسىن شاقىرىپ, ۇمىتكەرلەردىڭ تۋىندىسىن ساراپقا سالۋ ۇيىمداستىرۋشىلار تاراپىنان قاجىرلى ەڭبەكتى تالاپ ەتتى.
بيىلعى حالىقارالىق قازىلار القاسىنا بەلگىلى رەسەيلىك اكتەر, رەجيسسەر, ستسەناريست, كانن جانە شانحاي فەستيۆالدەرىنىڭ قاتىسۋشىسى, نيكا جانە تەفي سىيلىقتارىنىڭ يەگەرى يۋري بىكوۆ جەتەكشىلىك ەتەدى. سونداي-اق قازىلار قۇرامىندا «بوسفور» ستامبۋل كينوفەستيۆالىنىڭ كوركەمدىك جەتەكشىسى ەمرا كىليچ, قازاقستاندىق رەجيسسەر ءارى پروديۋسەر رۇستەم ءابىدراشوۆ, DocPoint, Camerimage, San Sebastian Film Festival سەكىلدى ءىرى حالىقارالىق كينوفەستيۆالدەردىڭ قاتىسۋشىسى, بەلارۋس رەجيسسەرى حاننا ميرونەنكو, كينوسىنشى, «2 morrow», «كراي سۆەتا. ۆوستوك», «پوسلانيە ك چەلوۆەكۋ» (سانكت-پەتەربۋرگ) كينوفەستيۆالدەرىنىڭ باعدارلامالىق ديرەكتورى الەكسەي مەدۆەدەۆ بار.
جاستار شىعارماشىلىعىنا ارنالعان كينو مەرەكەسىن الماتى قالاسى اكىمدىگىنىڭ, ۇلتتىق كينونى قولداۋ مەملەكەتتىك ورتالىعىنىڭ جانە شاكەن ايمانوۆ اتىنداعى «قازاقفيلم» كينوستۋدياسىنىڭ, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ قولداۋىمەن Tanaris Production كينوكومپانياسى ۇيىمداستىرادى.
كينوفەستيۆالدىڭ ۇيىمداستىرۋشىلارى مەن قازىلار القاسىنىڭ قاتىسۋىمەن وتكەن ءباسپاسوز ءماسليحاتىندا العاشقى بەتاشار ءسوزدى العان «باستاۋ» كينوفەستيۆالىنىڭ پرەزيدەنتى, Tanaris Production كينوكومپانياسىنىڭ جەتەكشىسى سەرگەي ءازىموۆ بيىلعى قاتىسۋشى جاستار سانى وتكەن جىلدارمەن سالىستىرعاندا, ءتورت-بەس ەسەگە كوپ ەكەنىن اتاپ ءوتتى.
–بيىل كەلىپ تۇسكەن 1500-دەن اسا جۇمىستى قاتاڭ ساراپتاۋدان وتكىزىپ, تەك 250 ءفيلمدى ىرىكتەۋگە جىبەردىك. ءبىزدىڭ فەستيۆالىمىز شىعارماشىلىقپەن اينالىساتىن جاستارعا باستاۋ بولاتىن, تاجىريبە الماسۋعا جانە جاس كينوگەرلەرگە ءوز جوبالارىن كەڭىنەن ناسيحاتتاۋعا, ونەردەگى ىنتىماقتاستىققا جول اشاتىن كاسىبي الاڭ. سوندىقتان دا بۇل الاڭ دارىندى جاستارىمىزعا فەستيۆالدىڭ قوناقتارىنان – كينو ءوندىرىسىنىڭ ءتۇرلى سالاسىنداعى كاسىبي ماماندار مەن ساراپشىلاردان ۇيرەنۋگە تاپتىرماس مۇمكىندىك سىيلايدى. جالپى فەستيۆالدىڭ باستى ەرەكشەلىگى – شىعارماشىلىق ەركىندىك. بايقاۋداعى جۇمىستارعا حالىقارالىق قازىلار القاسىمەن قوسا, ستۋدەنت جاستاردان قۇرالعان تورەشىلەر دە باعا بەرەدى. فەستيۆالدىڭ ناتيجەسىندە ۇلتتىق كينورەجيسسۋراداعى جاڭا تولقىننىڭ قارىمى بايقالماق,– دەدى.
بەلارۋس ەلىنەن كەلگەن حاننا ميرونەنكو: «ۆگيك-تە وقىپ جۇرگەنىمدە, ۇستازىمىز: سەندەر ءار جاڭا ءفيلمدى تالقىلاپ, سۇيەگىنە دەيىن شاعىپ, جىلىكتەپ, تالداعان كەزدە, ارينە, مامان كوزىمەن قارايسىڭدار. بىراق فيلمگە, ونداعى وقيعا مەن كەيىپكەرگە مي مەن باس ارقىلى قاراۋ جەتكىلىكسىز, جان مەن جۇرەكتى دە ىسكە قوسىڭدار. كاسىبي مامان بولعان جاقسى, بىراق ءوز جۇرەكتەرىڭدەگى كورەرمەندى ولتىرمەڭدەر» دەيتىن ەدى. مەن دە «باستاۋ» فەستيۆالىندەگى ءار ءفيلمدى جان-جۇرەگىممەن كورۋگە كەلدىم» دەدى.
«باستاۋدىڭ» كونكۋرستىق باعدارلاماسى 3 بولىمنەن تۇرادى: تولىقمەتراجدى فيلمدەر بايقاۋى – Bastau DEBUTS, قىسقامەتراجدى فيلمدەر بايقاۋى – Bastau SHORTS جانە دەرەكتى فيلمدەر بايقاۋى – Bastau DOCS.
ستۋدەنتتىك جانە دەبيۋتتىك قىسقامەتراجدى كوركەم جانە انيماتسيالىق فيلمدەر بايقاۋىنىڭ قازىلار القاسىن ستسەناريست, رەجيسسەر, BAFTA Student Film Award جۇلدەسىنىڭ يەگەرى جانە Berlinale Talents قاتىسۋشىسى تاتيانا فەدوروۆسكايا (رەسەي) باسقارادى. قازىلار القاسىنىڭ قۇرامىندا قازاقستاندىق انيماتسيالىق فيلمدەردىڭ رەجيسسەرى, «ۇلتتىق كينونى قولداۋ مەملەكەتتىك ورتالىعى» باس پروديۋسەرى اداي ابەلدينوۆ, تاجىك پوديۋسەرى, كينورەجيسسەر يسكاندار ۋسمونوۆ, رەسەيلىك تەاتر جانە كينو اكتەرى, رەجيسسەر يليا گليننيكوۆ جانە قىرعىز رەسپۋبليكاسىنان كەلگەن كينەماتوگرافيست, ازيا – تىنىق مۇحيتى ايماعى كينواكادەمياسىنىڭ مۇشەسى (APSA) داستان جاپارۋلۋ بار.
فەستيۆالدىڭ اشىلۋ سالتاناتى اباي اتىنداعى قازاق ۇلتتىق وپەرا جانە بالەت تەاترىندا وتەدى. «باستاۋ» داۋرەن قامشىباەۆتىڭ بايقاۋدان تىس كورسەتىلەتىن دەبيۋتتىك كارتيناسى «زەرەمەن» اشىلادى.