مينيستر الەكسەي تسوي دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋسپەن كەزدەستى, دەپ حابارلايدى Egemen.kz.
ء«بىز COVID-19-عا قارسى قازاقستاندىق ەكى ۆاكتسينا تۋرالى ايتىپ بەردىك. بىرەۋى – يناكتيۆتى QazCovid-in (نەمەسە QazVac) ۆاكتسيناسى, ەكىنشىسى – QazCoVac-P ۆاكتسيناسى. قازاقستان رەسپۋبليكاسىندا QazVac 18 ايعا ۋاقىتشا تىركەۋدەن ءوتتى. ول مۇسىلمان ەلدەرىندە جاسالعان جالعىز ۆاكتسينا بولىپ سانالادى. قازاقستان مۇسىلماندارى ءدىني باسقارماسى وعان حالال كۋالىگىن بەرگەن», دەپ جازدى تسوي الەۋمەتتىك جەلىدەگى پاراقشاسىندا.
ال QazCoVac-P ۆاكتسيناسى بيىل ماۋسىم ايىندا دۇنيەجۇزىلىك دەنساۋلىق ساقتاۋ ۇيىمىنىڭ كلينيكالىق زەرتتەۋلەر فازاسىنداعى كانديدات ۆاكتسينالار تىزىمىنە قوسىلعان بولاتىن.
ء«بىز ددسۇ باسشىسىنان قازاقستاندىق ۆاكتسينالاردى تىركەۋ جۇمىسىن تەزدەتۋدى سۇرادىق», دەپ اتاپ ءوتتى مينيستر.
سونداي-اق كەزدەسۋ كەزىندە كوروناۆيرۋستىڭ جاڭا شتامى – وميكرونعا قارسى ءىس-شارالار تالقىعا سالىندى. بۇگىندە ۆيرۋستىڭ جاڭا ۇلگىسى الەمنىڭ 10 ەلىندە انىقتالدى. الدىن الا مالىمەتكە سايكەس, ونىڭ تارالۋ قاۋپى جوعارى جانە انتيدەنەلەرگە قارسى تۇرا الادى.