بەلارۋسپەن شەكاراداعى ميگرانتتارمەن قاقتىعىس كەزىندە پولياك سولداتى جاراقات الدى, دەپ حابارلايدى Egemen.kz پولشانىڭ شەكارا كۇزەتىنىڭ رەسمي وكىلى اننا ميحالسكايانىڭ مالىمدەمەسىنە سىلتەمە جاساپ.
ول تۇندە چەرەمحا ەلدى مەكەنىنىڭ اۋماعىندا 200-گە جۋىق ميگرانتتان تۇراتىن توپ پولياك شەكاراسىنا شابۋىل جاساۋعا تىرىسقانىن ايتتى.
«وسى ارەكەتتەردىڭ ناتيجەسىندە پولياك اسكەرىنىڭ جاۋىنگەرى زارداپ شەكتى. ونىڭ باسىنان تاسپەن ۇرعان. سارباز اۋرۋحاناعا ءتۇستى», دەدى ميحالسكايا.
سوڭعى اپتالاردا بەلارۋس پەن پولشا شەكاراسىندا ەو ەلدەرىنە كىرۋ ۇمىتىمەن بىرنەشە مىڭ ميگرانت جينالدى. پولشا بيلىگى شەكارانى كۇزەتۋدى كۇشەيتتى. بيلىك زاڭسىز بوسقىنداردىڭ كوشى-قون داعدارىسىنا مينسكىنى كىنالاپ, ولاردىڭ ەلگە كىرۋ ارەكەتتەرىن توقتاتتى. بەلارۋس بيلىگى بۇل ايىپتاۋلاردىڭ بارلىعىن جوققا شىعارىپ, پولشا ميگرانتتاردى ءوز اۋماعىنان ماجبۇرلەپ شىعارىپ, بوسقىندارعا قاتىستى جاعدايدى جاساندى تۇردە ۇيىمداستىردى دەپ مالىمدەدى.
اننا ميحالسكايانىڭ ايتۋىنشا, ەكى ميگرانت اۋرۋحاناعا تۇسكەن. «ولاردىڭ بىرىندە دەمىكپە دەرتىنىڭ بەلگىلەرى بولعان», دەپ ءتۇسىندىردى شەكارا وكىلى.
ول تۇنگى شابۋىلدىڭ ناتيجەسىندە پولشا اۋماعىنا بىرنەشە مەترگە 170-كە جۋىق ادام كىرگەنىن ايتتى. پولياك قاۋىپسىزدىك كۇشتەرى ولاردى ودان ءارى جىبەرگەن جوق. بەلارۋس شەكارا سىزىعىنا قايتاردى.