قاراعاندى وبلىسىنىڭ يندۋسترياسى زاماناۋي كاسىپورىنمەن تولىقتى. وبلىس ورتالىعىندا «Qaz Carbon» جشق سارىارقا فەرروقورىتپا زاۋىتى اشىلدى. ول قىسقا مەرزىمدە – 9 ايدا سالىندى. سوڭعى ەكى جىلدا بۇل قالاداعى ەكىنشى زاۋىت, دەپ حابارلايدى Egemen.kz.
جوبا «قازاقستاننىڭ دامۋ بانكى» اق قارجىلىق قولداۋىمەن جۇزەگە اسىرىلدى. ونىڭ ىشىندە 11 ملرد تەڭگە – كومپانيانىڭ مەنشىكتى قاراجاتى, قدب قارىزى - 38,8 ملرد تەڭگە. زاۋىتتىڭ وندىرىستىك قۋاتى – جىلىنا 57 مىڭ توننا فەرروقورىتپا. ارقايسىسى 8 مۆت بولاتىن سەگىز پەش ورناتىلادى. زاۋىت تاۋلىگىنە 25 توننا ءتۇرلى فەرروقورىتپا شىعارۋعا قاۋقارلى.
ءبىرىنشى كەزەڭدە ءتورت پەش پايدالانۋعا بەرىلدى, قالعان تورتەۋى جىل سوڭىنا دەيىن پايدالانۋعا بەرىلەدى. وسى ۋاقىتقا دەيىن زاۋىت تولىعىمەن ءوزىنىڭ وندىرىستىك قۋاتىنا شىعادى.
«Qaz Carbon كومپانياسىنىڭ ءىرى ينۆەستيتسيالىق جوبالاردى ىسكە اسىرۋدا ۇلكەن تاجىريبەسى بار ەكەنىن اتاپ وتكىم كەلەدى. مۇنى ىسكە اسىرۋ مەملەكەت باسشىسىنىڭ ينۆەستيتسيالار تارتۋ, وڭدەۋ ونەركاسىبىندەگى ەڭبەك ونىمدىلىگىن ارتتىرۋ جونىندەگى تىكەلەي تاپسىرمالارىن ورىنداۋعا ىقپال ەتەدى. جاڭا زاۋىتتا 300-دەن استام تۇراقتى جۇمىس ورنى اشىلدى», دەدى قاراعاندى وبلىسىنىڭ اكىمى جەڭىس قاسىمبەك اشىلۋ سالتاناتىندا.
فەرروقورىتپا زاۋىتىنىڭ قۇرىلىسى 2020 جىلدىڭ جەلتوقسانىندا باستالدى. تامىز ايىندا العاشقى رۋدوتەرميالىق فەرروقورىتپا پەشى ىسكە قوسىلدى. قازىردىڭ وزىندە 3 مىڭ توننادان استام وتاندىق سيليكومارگانەتس ءوندىرىلدى. ءونىم شەتەلدىك تۇتىنۋشىلارعا – جاپونياعا, كورەياعا, ەو جانە تمد ەلدەرىنە جونەلتىلدى. الداعى ۋاقىتتا زاۋىت ەكسپورت كولەمىن ارتتىرادى.
«بۇگىن قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا ءبىز فەرروقورىتپا ءوندىرىسى بويىنشا تاعى ءبىر جوبانى اشىپ وتىرمىز. جاڭا كاسىپورىندا الەمدىك تەحنولوگيالىق ازىرلەمەلەر قولدانىلعان جانە جاڭا جابدىقتار ورناتىلعان. بۇل ءوندىرىس ەكولوگيالىق تازا, قورشاعان ورتاعا بارىنشا از اسەر ەتەدى. زاۋىتتا اۋانى لاستامايتىن ءۇش ساتىلى گاز تازالاۋ جۇيەسى قولدانىلعان. قالدىقتاردى قايتا پايدالانۋ كوزدەلەدى. Qaz Carbon جوباسىنىڭ جالپى سوماسى 50,7 ملرد تەڭگەنى قۇرايدى, وعان بايىتۋ فابريكاسى, اگلومەراتسيالىق فابريكاسى بار سارىارقا فەرروقورىتپا زاۋىتى جانە قولدانىستاعى ءوندىرىستى جاڭعىرتۋ كىرەدى», دەدى Qaz Carbon اكتسيونەرى ەرلان نىعماتۋلين.
زاۋىت قاراعاندى ءوڭىرىنىڭ شيكىزاتىن قايتا وڭدەۋگە جوبالانعان, بۇل ۇزدىكسىز وندىرىستىك تسيكلدى قامتاماسىز ەتۋگە جانە الەمدىك نارىقتارعا ساپالى ءونىم شىعارۋعا مۇمكىندىك بەرەدى. بۇل قازاقستاننىڭ ەكونوميكاسى مەن ەكسپورتتىق الەۋەتىنىڭ دامۋىنا ىقپال ەتەدى. وندىرىستىك پروتسەسس تولىعىمەن اۆتوماتتاندىرىلعان. پەشتەر ءۇش ساعات ىشىندە قورىتپالاردىڭ ءبىر تۇرىنەن ەكىنشىسىنە اۋىسا الادى.
«جاڭا زاۋىت – قازاقستانداعى قولايلى ينۆەستيتسيالىق احۋالدىڭ كورسەتكىشى. شەتەلدىك ينۆەستورلار رەتىندە ءبىز وسى جەردە جۇمىس ىستەۋ ءۇشىن جاسالعان زاڭنامالىق بازانى جانە باسقا دا جاعدايلاردى ەرەكشە اتاپ وتكىمىز كەلەدى. بۇل, ارينە, قازاقستاننىڭ بۇگىنگى تاڭدا فەرروقورىتپا نارىعىنداعى پەرسپەكتيۆالى ويىنشى عانا ەمەس, سونداي-اق ۇلكەن قورلارمەن مىقتى باسەكەلەس بولۋ فاكتورىنا اسەر ەتەدى», دەپ اتاپ ءوتتى Qaz Carbon توبىنىڭ اكتسيونەرى داۆيد كەمەرتەليدزە.
«Qaz Carbon يننوۆاتسيالىق كاسىپورنىندا قدب-ءنىڭ ستراتەگيالىق باعىتتارىنا – ءوڭىردىڭ الەۋمەتتىك-ەكونوميكالىق دامۋىنا, يمپورتتى الماستىرۋعا, ەكسپورتقا باعدارلانعان ستراتەگياعا جانە الەمدىك نارىقتا قوسىلعان قۇنى جوعارى باسەكەگە قابىلەتتى ءونىمنىڭ وتاندىق وندىرىسىنە تولىق كولەمدە سايكەس كەلەتىن زاۋىت قۇرىلتايشىلارىنىڭ بىرەگەي ينجەنەرلىك ويى ىسكە اسىرىلدى. سونداي-اق كومپانيانىڭ ەكولوگيالىلىق پەن ءوندىرىس قاۋىپسىزدىگىنىڭ جوعارى ستاندارتتارىنا بەيىلدىلىگى», دەپ اتاپ ءوتتى قازاقستاننىڭ دامۋ بانكى باسقارماسىنىڭ توراعاسى اباي ساركۋلوۆ.
Qaz Carbon كومپانياسى 2021 جىلدىڭ ءساۋىر ايىندا جىلىنا 2 ملن توننا كومىر وندىرەتىن بايىتۋ فابريكاسىن ىسكە قوسقانىن ەسكە سالا كەتەمىز. كومپانيانىڭ كورمە ورتالىعى سالىندى. وسى جىلدىڭ سوڭىنا دەيىن قۋاتى جىلىنا 200 مىڭ توننا اگلومەراتسيالىق فابريكانى ىسكە قوسۋ جوسپارلانۋدا.