بۇگىن قازاقستاننىڭ ح ازاماتتىق فورۋمىنىڭ جۇمىسى اياسىندا ازاماتتىق باستامالاردىڭ ءوسۋ نۇكتەلەرى تاقىرىبىنا ارنالعان ساراپتامالىق الاڭ ءوتتى, دەپ جازادى Egemen.kz.
الاڭعا قاتىسۋشىلار ازاماتتىق باستامالاردى جۇزەگە اسىرۋ مەن قولداۋدىڭ وزەكتى ماسەلەلەرىن, سونىڭ ىشىندە باسىم باعىتتاردى, زاماناۋي تاسىلدەردى, ۇزدىك تاجىريبەلەردى تالقىلاپ, بارلىق مۇددەلى تاراپتاردى ەسكەرە وتىرىپ, ازاماتتىق بەلسەندىلىكتى دامىتۋ تۇرعىسىندا قولايلى جاعدايلار قالىپتاستىرۋدىڭ ۇسىنىستارىن ازىرلەدى.
شاراعا ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياس مودەراتورلىق جاسادى.
الاڭ جۇمىسىن اشقان ول ازاماتتىق قوعامدى جاڭا جاعدايدا دامىتۋدىڭ وزەكتى تەتىكتەرى مەن تاسىلدەرىن ايقىنداۋ قاجەت ەكەندىگىن اتاپ ءوتتى.
«قازاقستاندا ازاماتتىق بەلسەندىلىكتى دامىتۋ جانە قولداۋ – مەملەكەتتىك ساياساتتىڭ باسىم مىندەتتەرىنىڭ ءبىرى. مەملەكەت باسشىسى قاسىم-جومارت توقاەۆ 2021 جىلعى 1 قىركۇيەكتەگى قازاقستان حالقىنا جولداۋىندا جەرگىلىكتى ءوزىن-ءوزى باسقارۋدى, ازاماتتىق مادەنيەتتى اۋىلدىق جەرلەردە دامىتۋدىڭ ماڭىزدىلىعىن اتاپ وتكەن بولاتىن. الداعى جىلدارى گرانت بەرۋشى ۇيىمداردىڭ جۇمىسىندا وزگەرىستەر جانە ولاردى قولداۋدىڭ جاڭا تەتىكتەرى ەنگىزىلەدى دەپ كۇتىلۋدە. وسىلايشا, ۇلىبريتانيانىڭ قايىرىمدىلىق قورلارى قاۋىمداستىعى (ACF) كوروناۆيرۋستىق ينفەكتسيانىڭ كوممەرتسيالىق ەمەس سەكتورعا اسەرىنە قاتىستى جۇرگىزگەن ساۋالناماسىنا سايكەس, بارلىق رەسپوندەنتتەر (96%), جاڭا گرانتتىق باعدارلامالاردى ىسكە قوسۋ, قارجىلاندىرۋدى ۇلعايتۋ جانە/نەمەسە ازايتۋ ارقىلى كوروناۆيرۋستىق پاندەمياعا بايلانىستى ءوز قىزمەتىن قانداي-دا ءبىر جولمەن قايتا قۇرعاندىعىن, ۇمىتكەرلەر مەن ولاردىڭ جوبالارىن ىرىكتەۋ ءتاسىلىن وزگەرتكەندىگىن مالىمدەدى. دەمەك, ازاماتتىق قوعامدى جاڭا جاعدايدا دامىتۋدىڭ وزەكتى تەتىكتەرى مەن تاسىلدەرىن ايقىنداۋدىڭ قاجەتتىلىگى بار», دەدى ل.دياس.
ساراپتامالىق الاڭ بارىسىندا ۇكىمەتتىك ەمەس, كورپوراتيۆتىك جانە حالىقارالىق سەكتورلاردىڭ الدىڭعى قاتارلى ۇيىمدارىنىڭ وكىلدەرى باياندامالارى تىڭدالدى.
كەزدەسۋدە سپيكەرلەر رەتىندە قازاقستانداعى ەۋروپالىق وداق وكىلدىگىنىڭ باعدارلامالىق مەنەدجەرى يۋري سكاسكەۆيچ, جاڭا جوبالاردى ىلگەرىلەتۋ جونىندەگى ستراتەگيالىق باستامالار اگەنتتىگىنىڭ (رف) كورپوراتيۆتىك ءوفيسىنىڭ ستراتەگيالىق باسقارۋ جانە ىشكى اۋديت ورتالىعىنىڭ ديرەكتورى اندرەي پىسين, ساياسي شولۋشى جانە جۋرناليست نيكيتا شاتالوۆ, قازاقستانداعى امەريكاندىق زاڭگەرلەر قاۋىمداستىعىنىڭ ازاماتتىق قوعام جونىندەگى تەحنيكالىق مەنەدجەرى ايگۇل كاپتاەۆا, قازاقستانداعى "Chevron" كومپانياسىنىڭ الەۋمەتتىك ينۆەستيتسيالار جونىندەگى كەڭەسشىسى لەيلا ايتمۋحانوۆا, الەۋمەتتىك كاسىپكەرلىك جانە الەۋمەتتىك باعدارلامالار سالاسىنداعى تاۋەلسىز ساراپشى جانار جاقسىلىقوۆا, «قوعامدىق ماڭىزى بار باستامالاردى دامىتۋ قورى» جق توراعاسى ەرمەك ءماجيتوۆ, «الەۋمەتتىك تالداۋ جانە سەرىكتەستىك ورتالىعى» قق وكىلى كونستانتين كوۆتۋنەتس ءسوز سويلەدى.
الاڭ ۇيىمداستىرۋشىلارى ءىس-شارا ۇەۇ مەن دونورلىق ۇيىمدار اراسىنداعى ديالوگ پەن ءوزارا ءىس-قيمىلدى نىعايتۋعا, ورتاق پروبلەمالاردى شەشۋگە, سونداي-اق, قازاقستان قوعامىن قولداۋ مەن دامىتۋدىڭ ءتيىمدى تاسىلدەرىن قالىپتاستىرۋ ءۇشىن الەۋمەتتىك باستامالاردى ىسكە اسىرۋدا رەسۋرستاردى جۇمىلدىرۋ جولدارىن ىزدەۋگە ايتارلىقتاي ىقپال ەتەتىندىگىنە سەنىمدى.
ەسكە سالايىق, الماتىدا تاۋەلسىزدىكتىڭ 30 جىلدىعىنا ارنالعان «قوعام مەن مەملەكەتتىڭ تۇراقتى دامۋى مۇددەسىندەگى ارىپتەستىكتىڭ 30 جىلى» اتتى مەرەيتويلىق X ازاماتتىق فورۋم وتۋدە.