دەمالىس كۇندەرى الماتى وبلىسىنىڭ قۇتقارۋشىلارى قار قۇرساۋىندا قالعان 9 ادامدى قۇتقاردى, دەپ حابارلايدى Egemen.kz.
ەكى جاعداي الاكول اۋدانىندا تىركەلسە, ءبىر شاقىرتۋ كەربۇلاق اۋدانىنان تۇسكەن,
الماتى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان حابارلاماعا سايكەس, ءۇشارال-دوستىق جولىنىڭ جالاڭاشكول ۋچاسكەسىندە قالعان اۆتوكولىكتە ءۇش ادام بولعان. ولاردىڭ بىرەۋى – بالا.
ال, كوكتۇما اۋىلىنان 15 شاقىرىم جەردە تراكتور قالىڭ قاردا قالىپ قويعان. ونىڭ ىشىندە ەكى ادام وتىرعان. الاكول اۋدانى جەدەل قۇتقارۋ جاساعىنىڭ قىزمەتكەرلەرى ولاردى كوكتۇما ەلدى مەكەنىنە ەۆاكۋاتسيالادى. ال ءتورت ادام مىنگەن «Toyota Hilux» اۆتوكولىگى كەربۇلاق اۋدانى, قويانكوز اۋىلى ماڭىندا قالىڭ قاردان وتە الماعان. سارىوزەك ءورت ءسوندىرۋ ءبولىمىنىڭ ماماندارى ولاردى ءجۇزاسۋ قىستاعىنداعى شارۋا قوجالىقتارىنىڭ بىرىنە جەتكىزدى.
قۇتقارۋشىلاردىڭ كومەگىنە مۇقتاج بولعان 9 ادامنىڭ بارلىعى امان.