قازاقستاندا ءداندى جانە ءداندى-بۇرشاقتى داقىلداردى جيناۋ اياقتالدى. اۋا رايىنىڭ قولايسىزدىعىنا قاراماستان 16,4 ملن توننا استىق باستىرىلىپ, ورتاشا ونىمدىلىك گەكتارىنا 10,3 تسەنتنەردى قۇرادى.
اۋىل شارۋاشىلىعى مينيسترلىگىنىڭ حابارلاۋىنشا, 80,8 مىڭ توننا قاراقۇمىق جينالعان. بۇل 2020 جىلعى دەڭگەيدەن76 پايىزعا ارتىق. سونداي-اق قارا بيداي وتكەن جىلمەن سالىستىرعاندا 43 پايىزعا, داندىك جۇگەرى 22,6 پايىزعا, بۇرشاق داقىلدارى 1,3 پايىزعا ارتىق جينالعان. تارى ونىمدىلىگى وتكەن جىلمەن سالىستىرعاندا 15 پايىزعا, جۇگەرى 5 پايىزعاوسكەن.
«جاڭا ەگىننىڭ استىعى جوعارى ساپالى كورسەتكىشتەرگە يە. ماسەلەن, ليتسەنزيالانعان استىق قابىلداۋ كاسىپورىندارىنا تاپسىرىلعان جۇمساق بيدايدىڭ جالپى كولەمىنىڭ 90,5 پايىزى 1-3 سىنىپتارعا جاتقىزىلعان. 2020 جىلى بۇل كورسەتكىش 81,2 پايىز-دى قۇراعان بولاتىن», دەلىنگەن مينيسترلىك حابارلاماسىندا.
قۇرامىندا ءدانى جوعارى بيداي ۇلەسىنىڭ ايتارلىقتاي وسۋى بايقالادى. بۇل رەتتە 3-سىنىپتى جۇمساق بيداي كولەمىندە الەمدىك نارىقتا سۇرانىسقا يە جوعارى ساپالى HI-Pro بيدايىنىڭ ۇلەسى شامامەن 60 پايىزدى قۇراعان.
«وسىرىلگەن استىق ىشكى نارىقتى تولىق قامتاماسىز ەتۋ ۇشىن, سونداي-اق ەكسپورتقا بەلگىلى ءبىر كولەمدى جونەلتۋ ۇشىن جەتكىلىكتى», دەيدى مينيسترلىك.
سونىمەن قاتار 3,9 ملن توننا كارتوپ, 4,9 ملن توننا كوكونىس داقىلدارى, 2,8 ملن توننا باقشا داقىلدارى جينالدى.
مايلى داقىلداردى جيناۋ جالعاسۋدا. ولاردىڭ جالپى جيناۋ الاڭىنىڭ 3 ملن گەكتارى (96,6 پايىزى) جينالىپ, 2,3 ملن تونناسى باستىرىلعان.