Air Astana اۋە كومپانياسىنىڭ ءباسپاسوز قىزمەتى ۇشاققا «بومبا» قويىلعانى تۋرالى اقپاراتقا قاتىستى مالىمدەمە جاسادى, دەپ حابارلايدى Egemen.kz.
«2021 جىلدىڭ 18 قاراشاسى كۇنى ساعات 20:45-تە Air Astana اۋە كومپانياسىنا كورشىلەس ەلدىڭ اۋماعى ارقىلى وتەتىن اۋە باعدارىندا قاۋىپتىڭ بار ەكەندىگى تۋرالى حابارلاما ءتۇستى. ءانونيمدى حابارلامادا اۋە كومپانياسىنىڭ اتاۋى دا, رەيس ءنومىرى, داتاسى جانە ۋاقىتى دا كورسەتىلمەگەن.
اۋە كومپانياسى قاۋىپسىزدىك ءىس-شارالارىن شۇعىل كۇشەيتىپ, ءوزىنىڭ بارلىق رەيستەرىنىڭ ۇشىپ كەلۋ جانە ۇشىپ كەتۋى كەزىندە قوسىمشا تەكسەرۋ جۇمىستارىن جۇرگىزدى. قاۋىپ تۋرالى اقپارات دالەلدەنگەن جوق. بارلىق ماتەريال ءتيىستى ءىس-شارا قابىلداۋ ءۇشىن قۇقىق قورعاۋ ورگاندارىنا جىبەرىلدى», دەپ اتاپ وتەدى اۋە كومپانياسىنىڭ ءباسپاسوز قىزمەتىنەن.
ايتا كەتەيىك, بۇگىن قر يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى بەلگىسىز ادامنىڭ «پۋلكوۆو - نۇر-سۇلتان» باعىتىنداعى ۇشاققا بومبا قويىلعانىن حابارلاعانى تۋرالى اقپارات تاراتقان بولاتىن.