كوروناۆيرۋس ىندەتى الەمدىك ساياسات پەن ەكونوميكانى تۇبەگەيلى وزگەرىسكە ۇشىراتتى. بۇل تۋرالى قر سىرتقى ىستەر مينيسترلىگىنىڭ كەڭەيتىلگەن القا ماجىلىسىندە قر پرەزيدەنتى قاسىم-جومارت توقاەۆ ءمالىم ەتتى, دەپ حابارلايدى Egemen.kz.
«سىرتقى ساياساتتى «حالىق ۇنىنە قۇلاق اساتىن مەملەكەت» تۇجىرىمداماسىنا ساي جۇرگىزىپ, ونىڭ تيىمدىلىگىن بارىنشا ارتتىرۋ. قازىر قازاقستاننىڭ سىرتقا باعىتتالعان جۇمىسىندا ءبىرتۇتاس جالپى مەملەكەتتىك ستراتەگيا جوق دەۋگە بولادى. بۇل - جۇيەلى سيپاتتاعى ماسەلە. سىرتقى ىستەر ءمينيسترى ۇكىمەتتە ەرەكشە مارتەبەگە يە بولىپ, پرەمەر-ءمينيستردىڭ ورىنباسارى دەڭگەيىنە كوتەرىلدى. وسىعان وراي سىرتقى ىستەر مينيسترلىگى تىعىز مەكەمەارالىق ۇيلەستىرۋ جۇمىسىن ءتيىمدى اتقارۋى كەرەك», دەدى مەملەكەت باسشىسى.
پرەزيدەنتتىڭ ايتۋىنشا, مەملەكەتتىك اپپارات ىشىندەگى بايلانىس, ءوزارا ىقپالداستىق ءالسىز. جەكەلەگەن مەكەمەلەردىڭ مۇددەسىنە باسىمدىق بەرىلىپ جاتادى. بۇل ءبىرازدان بەرى جالعاسىپ كەلە جاتقان تەرىس ءۇردىس.
«سونىڭ كەسىرىنەن ەلەۋلى كەمشىلىكتەر بولىپ جاتادى. بۇعان قوسا, ۇلتتىق مۇددەنى قورعايتىن كەزدە ءتيىمدى جۇمىس اتقارىلمايدى. مىسالى, قازىر جايىق وزەنى تارتىلىپ بارادى, قازاقستاننان جولداعان جۇك قىتاي شەكاراسىندا تۇرىپ قالدى. ءبىزدىڭ كاسىپكەرلەرىمىزدىڭ كورشى ەلدەردىڭ نارىعىنداعى مۇددەسى ويداعىداي قورعالماي وتىر. وسىنداي كەلەڭسىزدىكتەر حالىقتىڭ تۇرمىس ساپاسىنا جانە كوڭىل-كۇيىنە كەرى اسەر ەتەدى», ەدى قاسىم-جومارت توقاەۆ.