بۇگىن شىمكەنتتە YPO Forum Shymkent ءۇشىنشى بيزنەس-فورۋمى ءوتتى. جاڭا جاعدايداعى بيزنەس مۇمكىندىكتەرىن قاراستىرۋعا ارنالعان فورۋمعا قالا اكىمى مۇرات ايتەنوۆ جانە قازاقستاننىڭ بىرقاتار بەدەلدى بيزنەس وكىلدەرى مەن جەرگىلىكتى كاسىپكەرلەر قاتىستى, دەپ حابارلايدى Egemen.kz.
فورۋمنىڭ اشىلۋىندا ءسوز سويلەگەن قالا اكىمى وتاندىق بيزنەستى دامىتۋدا بۇگىنگى ىسكەرلىك جيىننىڭ ماڭىزى جوعارى ەكەنىن اتاپ ءوتتى.
«مەملەكەت باسشىسى كاسىپكەرلەردى قولداۋ جانە قورعاۋ ەل دامۋى ءۇشىن ماڭىزدى مىندەت ەكەنىن ايتتى. وتاندىق بيزنەستى دامىتۋ, جاڭا جاعدايداعى ىسكەرلىك مۇمكىندىكتەردى ىلگەرىلەتۋ بويىنشا بۇگىنگى فورۋم جەمىستى بولادى دەگەن سەنىمدەمىن. مەملەكەتتىك قولداۋلاردىڭ ناتيجەسىندە ەلىمىزدە وڭتايلى بيزنەس كليمات قالىپتاستى. قازاقستاندىق بيزنەس اشىق جانە ءموبيلدى بولا ءتۇستى. كاسىپكەرلەرىمىز ءۇشىن جاڭا مۇمكىندىكتەر اشىلدى. ءبىز ينۆەستورلار ءۇشىن قولايلى بيزنەس كليمات قالىپتاستىرۋ جۇمىستارىن جالعاستىراتىن بولامىز. شىمكەنت بەدەلدى ىسكەرلىك ورتامەن سەرىكتەستىكتى نىعايتۋعا ارقاشان دايىن ەكەنىن جەتكىزەمىن!», دەدى م.ايتەنوۆ.
ءىس-شارا بارىسىندا مۇرات ايتەنوۆ بيىل قالا ونەركاسىبىنىڭ كولەمى 411 ملرد تەڭگەدەن 711,5 ملرد تەڭگەگە جەتەتىنىن ايتتى. قالاعا وسى ۋاقىت ىشىندە 2,6 ترلن تەڭگە ينۆەستيتسيا تارتىلىپ, 200-دەن اسا جاڭا كاسىپورىندار اشىلىپ, جۇمىس ورىندارىنىڭ سانى 20 مىڭنان اسقان. شاعىن جانە ورتا بيزنەس سالاسىندا – 87 مىڭنان استام كاسىپكەرلىك سۋبەكتىلەر تىركەلىپ, جالپى وڭىرلىك ونىمدەگى ۇلەسى 41,6%-عا جەتتى.
بيزنەس-فورۋمنىڭ مودەراتورى «Centrasia Group» باسقارماسىنىڭ توراعاسى الماس قۇدايبەرگەن بولدى.
YPO (Young Presidents Organization) – ءار ەلدە ءوز بولىمشەلەرى بار بيزنەسمەندەردىڭ جابىق حالىقارالىق كلۋبى. الەم بويىنشا كلۋبتىڭ 25 مىڭ تابىستى باسشىلارى مەن بيزنەس باسقارۋشى مۇشەلەرى بار. قازاقستاندا YPO قۇرامىنا 34 كاسىپكەر كىرەدى.
فورۋم مىنبەرىندە Chocofamily ينتەرنەت-حولدينگىنىڭ نەگىزىن قالاۋشى جانە وسى ۇيىمنىڭ باقىلاۋشىلار كەڭەسىنىڭ توراعاسى راميل مۋحورياپوۆ, Tan Media توبىنىڭ قۇرىلتايشىسى, «31-ارنا» تەلەراديوكومپانياسى مەن بىرقاتار تاۋەلسىز بۇقارالىق اقپارات قۇرالدارىنىڭ جەتەكشىسى ارمانجان بايتاسوۆ, Bilim Media توبىنىڭ قۇرىلتايشىسى ءارى جەتەكشىسى راۋان كەنجەحان ۇلى, Freedom Holding Corp كومپانياسىنىڭ باس اتقارۋشى ديرەكتورى جانە ديرەكتورلار كەڭەسىنىڭ توراعاسى تيمۋر تۋرلوۆ, Alageum Electric كومپانيالار توبىنىڭ قۇرىلتايشىسى ەركەبۇلان يلياسوۆ, BI Group قۇرىلىس كومپانياسىنىڭ نەگىزىن قالاۋشى, كومپانيانىڭ ديرەكتورلار كەڭەسىنىڭ توراعاسى ايدىن راحىمباەۆ ءسوز سويلەپ, تاجىريبەسىمەن ءبولىستى.