قازاقستان پارلامەنتى سەناتىنىڭ توراعاسى ماۋلەن اشىمباەۆ ەۋروپا كەڭەسى پارلامەنتتىك اسسامبلەياسىنىڭ توراعاسى ريك دەمسپەن كەزدەستى, دەپ جازادى Egemen.kz.
تاراپتار كەزدەسۋدە قازاقستان مەن ەكپا اراسىنداعى ىنتىماقتاستىقتى ارتتىرۋ, ءبىزدىڭ ەلىمىزدەگى ساياسي رەفورمالاردى زاڭنامالىق تۇرعىدان قامتاماسىز ەتۋ جانە ادام قۇقىقتارىن ىسكە اسىرۋ ماسەلەلەرىن تالقىلادى.
سەنات توراعاسى ءوز سوزىندە قازاقستانعا ەكپا-مەن ىنتىماقتاستىق اسا ماڭىزدى ەكەنىن اتاپ ءوتتى.
ء«بىر توپ دەپۋتاتتاردىڭ ەكپا-نىڭ كۇزگى سەسسياسىندا «قازاقستانداعى ساياسي رەفورما ونىڭ ازاماتتارىنىڭ قاجەتتىلىكتەرى مەن ماقسات-نيەتىنە جاۋاپ بەرەدى» دەگەن دەكلاراتسياسىن قابىلداۋىن اسا ماڭىزدى وقيعا دەپ ەسەپتەيمىز. ەكپا دەپۋتاتتارى قازاقستانعا تۇراقتى تۇردە كەلىپ تۇرادى, سايلاۋدى باقىلاۋ جونىندەگى ميسسيالار مەن باسقا دا شارالارعا قاتىسادى. پاندەمياعا بايلانىستى قالىپتاسقان جاعداي تۇراقتالا باستاعالى وسىنداي بايلانىستاردىڭ وفلاين تۇرىندە ءوتىپ جاتقانىن قۋانتادى. ەۋروپالىق ارىپتەستەرىمىزبەن سىندارلى ديالوگتى الداعى ۋاقىتتا ودان ءارى دامىتۋعا مۇددەلىمىز», دەدى ماۋلەن اشىمباەۆ.
جۇزدەسۋشىلەر ءبىزدىڭ ەلىمىزدەگى ساياسي جۇيەنى ودان ءارى دەموكراتيالاندىرۋ ماسەلەلەرى تۋرالى پىكىر الماستى. ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ ەلىمىزدى جاڭعىرتۋ جونىندەگى كۇن ءتارتىبى جانە سونىڭ اياسىندا جۇزەگە اسىپ جاتقان ساياسي رەفورمالار تۋرالى ايتتى. سەنات توراعاسى قازاقستان پارلامەنتى ەل پرەزيدەنتىنىڭ ساياسي باستامالارىن زاڭنامالىق تۇرعىدا قامتاماسىز ەتۋ جولىندا اۋقىمدى جۇمىس اتقارىپ وتىرعانىن اتاپ ءوتتى.
«مەملەكەت باسشىسىنىڭ باستاماسىمەن جۇرگىزىلىپ جاتقان ساياسي رەفورمالار ستراتەگيالىق سيپاتقا يە. اتالعان باستامالار ساياسي جۇيەنى ودان ءارى دەموكراتيالاندىرۋعا, ونىڭ اشىقتىعىن قامتاماسىز ەتۋگە, ساياسي باسەكەلەستىكتى ارتتىرۋعا, ازاماتتاردىڭ قۇقىقتارىن ىسكە اسىرۋعا قاجەتتى جاعدايلار جاساۋعا ارنالعان», دەدى ماۋلەن اشىمباەۆ.
سەنات توراعاسى اڭگىمە بارىسىندا قازاقستان پارلامەنتى ەكپا-مەن ءتۇرلى باعىتتار بويىنشا ىنتىماقتاستىق ورناتۋعا دايىن ەكەنىن ايتتى.
ء«بىزدىڭ ەلىمىز ەۋروپا كەڭەسىنىڭ بىرقاتار حالىقارالىق باستامالارىن, سونداي-اق, قازىرگى زامانعى مەملەكەتتەردىڭ تۇراقتىلىعى, وركەندەۋى, قاۋىپسىزدىگى مەن ەكونوميكالىق دامۋى ءۇشىن قاجەتتى نەگىزگى شارتتار سانالاتىن امبەباپ قۇندىلىقتاردى – دەموكراتيانى, ادام قۇقىقتارىن جانە زاڭ ۇستەمدىگىن قولدايدى», دەدى ماۋلەن اشىمباەۆ.
سەنات توراعاسى ءسوزىنىڭ سوڭىندا قازاقستان ساياسي رەفورمالاردىڭ كۇن ءتارتىبىن قارقىندى ىلگەرىلەتۋگە, ازاماتتاردىڭ قۇقىقتارىن قورعاۋ جونىندە شارالار قابىلداۋعا نيەتتى ەكەنىن اتاپ ءوتتى. پارلامەنت سەناتىنىڭ دەپۋتاتتارى وسى جۇمىستارعا بەلسەندى تۇردە اتسالىسا بەرەدى.