الماتى وبلىسىندا ءبىر وتباسى كولىگىمەن باتپاققا باتىپ كەتتى

بۇل تۋرالى Instagram جەلىسىندەگى پاراقشالاردىڭ بىرىندە حابارلاندى.

الدىن الا بولجام بويىنشا ولار الماتى قالاسىنان شىققان. ال تالدىقورعان دەگەن جازۋى بار ماڭايدان وتكەننەن كەيىن بايلانىس ۇزىلگەن. وزگە مالىمەتتەر ءالى انىقتالىپ جاتىر. جەرگىلىكتى تۇرعىنداردىڭ حابارلاۋىنشا بۇل وتباسى 14 قاراشادان باستاپ ءىز-ءتۇزسىز جوعالىپ كەتكەن.   «كەشەدەن بەرى ءىز-ءتۇسسىز جوعالىپ كەتكەن ءبىر وتباسىنىڭ ادامدارى, ۇشتوبە تراسساسىنىڭ بويىنداعى باتپاقتىڭ ىشىنەن اۆتوكولىكپەن بىرگە تابىلدى. ءۇش ادام مەرت بولدى», دەپ جازىلعان Instagram پاراقشادا.

كەيىنىرەك وسى توپتا كولىكتىڭ ۇشتوبەگە بارا جاتقان جولدا اۋدارىلعان كۇيى باتپاقتى سۋ توعانىنان تابىلعانى حابارلاندى. الماتى وبلىستىق پوليتسيا دەپارتامەنتىنىڭ مالىمەتىنشە, 15 قاراشادا تالدىقورعان قالالىق پوليتسيا بولىمىنە 27 جاستاعى قاراتال اۋدانىنىڭ تۇرعىنى 14 قاراشا ساعات 17.00 شاماسىندا «Skoda Superb» ماركالى كولىكپەن اتا-اناسى مەن اپكەسى جولعا شىعىپ كەتىپ, ءىز-ءتۇزسىز جوعالعانىن ايتقان.

«سول كۇنى پوليتسيا قىزمەتكەرلەرى «تالدىقورعان-ۇشتوبە» تاسجولىنان اۋدارىلعان «Skoda Superb» كولىگىن تاپتى.

الدىن الا مالىمەت بويىنشا, 60 جاستاعى جۇرگىزۋشى ءرۋلدى يگەرە الماي, اۋدارىلعان. جول اپاتى سالدارىنان جۇرگىزۋشى مەن ونداعى 47 جانە 19 جاستاعى جولاۋشىلار وقيعا ورنىندا مەرت بولعان.

قازىرگى ۋاقىتتا قر قك 345-بابى 4-بولىگى بويىنشا سوتقا دەيىنگى تەرگەۋ امالدارى ءجۇرىپ جاتىر. وقيعانىڭ ءمان-جايى انىقتالۋدا», دەدى الماتى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.