اسقار مامين «سبەربانكپەن» جاسالعان مەموراندۋمعا قاتىستى پىكىر ءبىلدىردى

«تاعى دا قايتالاپ ايتقىم كەلەدى: ءبىرىنشى كەزەكتە ءبىز ءۇشىن جەكە دەرەكتەردى قورعاۋ مەن اقپاراتتىق قاۋىپسىزدىك باسىمدىقتا بولادى. تەك قانا «سبەر» پلاتفورماسى بىزگە كودتاردى الۋعا جانە كودتاردى اقپاراتتىق قاۋىپسىزدىك ورگاندارىندا ساقتاۋعا مۇمكىندىك بەرەدى. ياعني شىن مانىندە ءبىز جەكە دەرەكتەردىڭ قورعالۋىن قامتاماسىز ەتۋگە كەپىلدىك بەرەمىز. جانە ارينە ەڭ باستى شارت – ءبىزدىڭ ءارى قاراي دا تسيفرلىق ترانسفورماتسيالانۋىمىز. بىزدە قازاقستاندا 400-گە جۋىق اقپاراتتىق جۇيە بار, ولاردىڭ ءبىر-بىرىمەن ءوزارا ارەكەتتەسۋى تومەن دەڭگەيدە, دەرەكتەر ايىرماشىلىعى بار جانە بۇل ءاردايىم ءتيىمدى بولا بەرمەيدى. پلاتفورمالىق شەشىمدەر ارقىلى ءبىز بۇل ماسەلەنى شەشە الامىز دەپ ۇمىتتەنەمىز», دەدى ا. مامين.

ۇكىمەت باسشىسى بۇل جۇمىسقا جەرگىلىكتى قازاقستاندىق IT-سەكتور دا تارتىلاتىنىن اتاپ ءوتتى.

«IT-سەكتور مەن قوسىمشالاردى دامىتۋ ءۇشىن ءبىز مىندەتتى تۇردە ءوزىمىزدىڭ IT-سەكتوردى تارتامىز. سوندىقتان ءبىزدىڭ ازاماتتارىمىزدا تسيفرلىق تاۋەلسىزدىكتىڭ جوعالۋى نەمەسە جەكە دەرەكتەردىڭ قولدى بولۋى جونىندە الاڭداۋشىلىق بولماۋى ءتيىس. بۇل ءۇشىن ءبىز جاۋاپتىمىز. ۇكىمەت جاۋاپتى. جانە ءبىز بۇل مىندەتتى قامتاماسىز ەتەمىز. بىراق مەملەكەتىمىزدىڭ ودان ءارى دامۋى تۇرعىسىنان, تسيفرلىق ترانسفورماتسيا تۇرعىسىنان بۇل جاي عانا قاجەتتىلىك. ءبىز وسى باعىتتا جۇمىس ىستەۋىمىز كەرەك جانە سەرىكتەس رەتىندە بۇگىندە «سبەر» توبىمەن جۇمىس ىستەپ جاتىرمىز», دەدى اسقار مامين.