دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا ۆاكتسينالاۋ پاسپورتىندا رەۆاكتسيناتسيا تۋرالى دەرەكتەر بولاتىنىن ايتتى, دەپ حابارلايدى Egemen.kz.
«رەۆاكتسيناتسياعا قاراماستان, ۆاكتسينانىڭ ەكى دوزاسىن سالدىرعان ادامدا Ashyq-تاعى «جاسىل» ستاتۋس ءبىر جىل ساقتالادى. ياعني, قايتا ۆاكتسينا الاتىندارعا بۇل مەرزىمدى ۇزارتۋ مۇمكىندىگىن قاراستىرىپ جاتىرمىز. تەك ونىڭ قانشا ۋاقىتقا سوزىلاتىنىن انىقتاۋ كەرەك», دەدى ەسماعامبەتوۆا ورتالىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا, الەمدە كوروناۆيرۋسقا قارسى يممۋنيتەت قانشاعا سوزىلاتىنى تۋرالى دالەلدەنگەن دەرەكتەر جەتكىلىكسىز.
«سونىمەن قاتار 7 ايدان ءبىر جىلعا دەيىن, ءارتۇرلى دەرەكتەر بار. سوندىقتان دەرەكتەرگە سۇيەنە وتىرىپ, Ashyq-تاعى «جاسىل» مارتەبە ءبىر جىلعا بەلگىلەندى. كەيبىر جاڭا دەرەكتەرگە سۇيەنسەك, ءيا, يممۋنيتەت ۇزاققا سوزىلادى, بىراق, وكىنىشكە قاراي, الەمدە بولىپ جاتقان جاعدايدى جانە رەۆاكتسيناتسيانى ەسكەرسەك يممۋنيتەت ايتارلىقتاي ۇزاققا سوزىلمايدى», دەپ ءتۇسىندىردى ەسماعامبەتوۆا.
ەسماعامبەتوۆا بارلىق ۆاكتسينالاۋ دەرەگى ۆاكتسينالاۋ پاسپورتىندا ناقتى ۆاكتسينا مەن ۆاكتسينالاۋ كۇنىن كورسەتە وتىرىپ ەنگىزىلەتىنىن ايتتى.