كوكشەتاۋدا قۇرىلىسشى 9-شى قاباتتان قۇلاپ مەرت بولدى. پوليتسيا قىلمىستىق ءىس قوزعادى, دەپ حابارلايدى Egemen.kz.
اقمولا وبلىستىق پد ءباسپاسوز قىزمەتىنىڭ مالىمەتىنشە, 9 قاراشا كۇنى كوكشەتاۋ قالاسى پوليتسيا باسقارماسىنىڭ كەزەكشى بولىمىنە جەدەل مەديتسينالىق جاردەم فەلدشەرى تەلەفون ارقىلى حابارلاسقان. ول قۇرىلىس جۇمىسى كەزىندە 9-قاباتتان ابايسىزدا 1966 جىلعى وبلىس ورتالىعىنىڭ تۇرعىنى قۇلاعانىن ايتتى. ەر ادام العان دەنە جاراقاتىنان كوز جۇمعان.
«بيىلعى 10 قاراشاداعى سوت-مەديتسينالىق ساراپتامانىڭ قورىتىندىسىنا سايكەس ولىمگە «باستىڭ دەفۋزدى جاراقاتى, باستىڭ, ءىشتىڭ, جامباستىڭ, قول-اياقتىڭ ۇيلەسىمدى جاراقاتى, بيىكتىكتەن قۇلاۋ» سەبەپ بولعان. بۇل جاعداي قىلمىستىق كودەكستىڭ 277-ءشى بابىنىڭ 2-ءشى بولىگى (قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ) بويىنشا سوتقا دەيىنگى تەرگەۋلەردىڭ بىرىڭعاي تىزىلىمىنە ەنگىزىلگەن», دەدى ۆەدومستۆودان.