الماتى قالاسىندا «ماڭگىلىك بىرگەمىز» اتتى حالىقارالىق اۆتورلىق ينتەرەرلىك قۋىرشاقتار كورمەسى ءوتىپ جاتىر. ءا.قاستەەۆ اتىنداعى مەملەكەتتىك ونەر مۋزەيىندە ۇيىمداستىرىلعان كورمە ادامزاتتىڭ عارىشقا العاش رەت ۇشقانىنا 60 جىل تولۋى مەن قازاقستانداعى «بالالار مەن جاسوسپىرىمدەردىڭ وقۋىن قولداۋ» جىلىنا ارنالىپ وتىر.
اتالعان كورمەنىڭ 2021 جىلعى رەسمي قۋىرشاعى كوكشەتاۋلىق شەبەر اناستاسيا ەليسەەۆانىڭ «گاگارين. عارىشتا تۇڭعىش رەت» اتتى جۇمىسى بولىپ وتىر. بۇل قۋىرشاق بيىل عارىشقا ۇشقان رەسەيلىك كينو توبىنىڭ قۇرامىندا بولعان اكتريسا يۋليا پەرەسيلدكە تاپسىرىلماق. سونداي-اق اناستاسيا ەليسەەۆانىڭ «گاگارين» توپتاماسىنان ەكى جۇمىس ماسكەۋدەگى كوسموناۆتيكا مۋزەيىندە وتەتىن تاقىرىپتىق كورمەگە قاتىسۋعا شاقىرۋ الدى.
«ماڭگىلىك بىرگەمىز» بەسىنشى حالىقارالىق اۆتورلىق ينتەرەرلىك قۋىرشاقتار كورمەسى 14 قاراشاعا دەيىن سوزىلادى.