ەاەو-دا قاداعالاۋ ءۇشىن ناۆيگاتسيالىق پلومبالار قولدانىلادى

بيىل قازاقستان ەۋرازيالىق ەكونوميكالىق وداقتا تاسىمالداۋدى قاداعالاۋ ءۇشىن ناۆيگاتسيالىق پلومبالاردى قولدانۋ تۋرالى كەلىسىمگە قول قويۋعا نيەتتى.

وسى كەلىسىم بويىنشا جۇمىس 2017 جىلدان باستاپ ەاەو ەلدەرى ساراپشىلارىنىڭ جانە ەۋرازيالىق ەكونوميكالىق كوميسسيا قىزمەتكەرلەرىنىڭ قاتىسۋىمەن جۇرگىزىلدى.

«جۇمىس كۇردەلى بولدى, بارلىق مۇددەلى مەملەكەتتىك ورگاندار مەن تاراپتاردىڭ بيزنەس-قوعامداستىعى قاتىستى, كوپتەگەن پىكىرلەر مەن ۇستانىمدار بولدى. مەملەكەتىشىلىك كەلىسۋدىڭ ەكى كەزەڭى وتكىزىلدى. بۇگىنگى تاڭدا بارلىق كەلىسپەۋشىلىكتەر جويىلدى», - دەدى مكك-دە.

جالپى كەلىسىم ناۆيگاتسيالىق پلومبالاردى قولدانا وتىرىپ, تاۋارلاردى ەاەو-عا مۇشە ەكى جانە ودان دا كوپ مەملەكەتتەردىڭ اۋماقتارى بويىنشا وتكىزۋ كەزىندە ولاردى قاداعالاۋ مۇمكىندىگىن كوزدەيدى.

ءاربىر ەلدىڭ ناۆيگاتسيالىق پلومبالاردى قولدانۋ جونىندەگى جۇمىستى ۇيىمداستىرۋ فۋنكتسياسىن وزىنە الاتىن ءوز ۇلتتىق وپەراتورى بولادى.

بۇل رەتتە كولىكتىڭ ەرەكشەلىگىن ەسكەرە وتىرىپ, تاۋارلاردىڭ ساناتىنا بايلانىستى وتپەلى كەزەڭدەر كوزدەلگەن. بۇل تاسىمالداۋدىڭ ءاربىر كەزەڭىن قاداعالاي وتىرىپ, ناۆيگاتسيالىق پلومبالاردى قولدانۋ پروتسەسىنىڭ تيىمدىلىگىن جەتىلدىرۋگە مۇمكىندىك بەرەدى.

«بيزنەس ءۇشىن وسى كەلىسىمنىڭ ارتىقشىلىقتارى ەاەو كەڭىستىگىندە ءوز تاۋارلارىنىڭ قاۋىپسىز ءترانزيتى مۇمكىندىگىندە, ەاەو باقىلاۋشى ورگاندارى تاراپىنان باقىلاۋدىڭ قوسىمشا نىساندارى مەن شارالارىن الىپ تاستاۋدا بولىپ وتىر.

ياعني, ەگەر پلومبا سالىنعان بولسا, وندا ەاەو-نىڭ ءاربىر مەملەكەتىندە تاۋاردى, ال كەيبىرەۋلەرىندە ءبىر باعىت ءۇشىن بىرنەشە رەتتەن تەكسەرۋدىڭ قاجەتى جوق. مۇنداي جاعدايلار شىعىنداردى ايتارلىقتاي تومەندەتەدى جانە جالپى بيزنەس ءۇشىن قوسىمشا اكىمشىلىك كەدەرگىلەردى الىپ تاستاۋعا ىقپال ەتەدى», دەپ اتاپ ءوتتى مەملەكەتتىك كىرىستەر كوميتەتىندە.

مەملەكەت وسى كەلىسىمنەن حالىقارالىق تاسىمالداردىڭ اشىقتىعىنا, «جالعان ترانزيت» پەن «جالعان يمپورتتى» جويۋعا جانە تيىسىنشە قازىناعا تۇسەتىن كىرىستىڭ ۇلعايۋىنا قول جەتكىزبەك.

قازىرگى ۋاقىتتا كەلىسىم جوباسى قوعامدىق تالقىلاۋ ءۇشىن legalacts.egov.kz  (سىلتەمە: https://legalacts.egov.kz/npa/view?id=12705829 سىلتەمە بويىنشا تانىسۋعا بولادى) سايتىنا ورنالاستىرىلعان.