قر قارجىلىق مونيتورينگ اگەنتتىگىنىڭ تۇركىستان وبلىسى بويىنشا اۋماقتىق دەپارتامەنتىنىڭ قىزمەتكەرلەرى كونترافاكتىلىك كىر جۋ ۇنتاقتارىن دايىندايتىن استىرتىن تسەح قىزمەتىنىڭ جولىن كەستى, دەپ جازادى Egemen.kz.
جەدەل-ىزدەستىرۋ شارالارى بارىسىندا تۇركىستان قالاسىنىڭ تۇرعىنى ر. ابدۋللاەۆ «يشتيحات» تۇرعىن الابى, دوسپانبەت جىراۋ كوشەسى مەكەنجايى بويىنشا تسەح ۇيىمداستىرعانى, وندا زاڭسىز جولمەن «Ariel», «تide», «ميف», «Persil» ماركالى 2, 3, 6 كگ كولەمدەگى ۇنتاقتار دايىنداعانى انىقتالدى.
ۇنتاقتاردى بۋىپ-تۇيۋگە جانە ولشەپ-وراۋعا ارنالعان 7 جابدىق, 500-دەن استام ۇنتاق قاپتاماسى, 20 كگ-دىق 100-دەن استام ۇنتاق, بەلگىلى ماركالاردىڭ اتاۋلارى بار پوليەتيلەن پاكەتتەر تاركىلەنىپ الىندى. قۇقىق يەسى «The Procter&Gamble Company» كومپانياسىنا زور زالال كەلتىرىلدى. ر. ابدۋللاەۆقا 5,9 ميلليون تەڭگە كولەمىندە ايىپپۇل سالىندى.
«كونترافاكتىلىك تاۋارلاردى ءوندىرۋ جانە ساتۋ – بۇل كوپ ميللياردتىق اينالىمدى قامتيتىن جاھاندىق ماسەلە. بۇل مەملەكەتكە دە, ازاماتتاردىڭ دەنساۋلىعى مەن قاۋىپسىزدىگىنە دە ايتارلىقتاي زيان كەلتىرەدى. قاۋىپ سونىمەن قاتار كيىم مەن بالالار ويىنشىقتارىنان باستاپ تاماق پەن ءدارى-دارمەكتەرگە دەيىن كونترافاكتىلىك ونىمدەردىڭ كەڭ تاڭداۋىندا جاتىر. قارجىلىق مونيتورينگ اگەنتتىگى كونترافاكتىنى ءوندىرۋ جانە وتكىزۋ دەرەكتەرىمەن كۇرەس جۇرگىزۋدە», دەلىنگەن قر قارجىلىق مونيتورينگ اگەنتتىگىنىڭ ءباسپاسوز قىزمەتى تاراتقان اقپاراتتا.