اقمولا وبلىسىندا جەكەمەنشىك ۇيدە گاز-اۋا قوسپاسىنىڭ جارىلۋى سالدارىنان ءۇي يەسى كوز جۇمدى, دەپ حابارلايدى Egemen.kz اقمولا تجد-نە سىلتەمە جاساپ.
رەسمي مالىمەتكە سايكەس, قايعىلى وقيعا 7 قاراشادا تسەلينوگراد اۋدانى قىزىلسۋات اۋىلىندا بولعان.
جەكە تۇرعىن ءۇي اۋماعىندا اۆتونومدى گازبەن جىلىتۋ جۇيەسى ورناتىلعان. ءۇي يەسى دالاداعى گازگولدەر (گاز ساقتاعىش) قۇدىعىن اشقان كەزدە گاز-اۋا قوسپاسى جارىلعان. بىراق ءورت شىقپاعان.
«وقيعا ورنىندا 1948 جىلى تۋعان ءۇي يەسى كوز جۇمدى. قازىرگى تاڭدا وقيعانىڭ ءمان-جايى انىقتالىپ جاتىر. سوت-مەديتسينالىق ساراپتاما تاعايىندالدى», دەيدى قۇتقارۋشىلار.
توتەنشە جاعدايلار دەپارتامەنتى حالىقتى قاۋىپسىزدىك شارالارىن بارىنشا ساقتاۋعا ۇندەدى.