قر قارۋلى كۇشتەرىنىڭ اسكەري قىزمەتشىلەرى ۇقشۇ بىتىمگەرشىلىك كۇشتەرىمەن رەسەي فەدەراتسياسىنداعى وقۋ-جاتتىعۋلارعا قاتىسادى, دەپ حابارلايدى Egemen.kz قر قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
وقۋ-جاتتىعۋدىڭ اشىلۋى ءراسىمى بۇگىن قازانداعى جۋكوۆ قىزىل تۋ وردەندى جوعارى كوماندالىق تانك ۋچيليششەسىنىڭ پوليگونىندا وتەدى.
وقۋ-جاتتىعۋدىڭ نەگىزگى ماقساتى – بەيبىتشىلىكتى قولداۋ جونىندەگى وپەراتسيالاردى جۇرگىزۋدە ۇقشۇ ۇجىمدىق بىتىمگەرشىلىك كۇشتەرىنىڭ قۇرامىنا كىرەتىن اسكەري بولىمدەر مەن بولىمشەلەردىڭ ۇيلەسىمدىلىگىن ارتتىرۋ. ۇقشۇ ۇجىمدىق كۇشتەرىنىڭ توپتارى الدىندا بىتىمگەرشىلىك وپەراتسيانى دايىنداۋ جانە جۇرگىزۋ بويىنشا تاپسىرمالاردى پىسىقتاۋ مىندەتى تۇر. بىتىمگەرلەردىڭ وقۋ-جاۋىنگەرلىك تاپسىرمالارىنا بوسقىندار لاگەرىندە جۇمىس ىستەۋ, گۋمانيتارلىق جۇگى بار لەكتەردى الىپ ءجۇرۋ, داعدارىس اۋدانىندا ورنالاسقان ەلدى مەكەندى وقشاۋلاۋ جانە توسقاۋىل بەكەتتەرىندە قىزمەت ۇيىمداستىرۋ كىرەدى.
وقۋ-جاتتىعۋدىڭ قورىتىندى بولىگىندە ۇجىمدىق كۇشتەردىڭ توپتارى جاۋىنگەرلىك بولىمشەلەرمەن «سودىرلار» ورنالاسقان عيماراتقا شابۋىل جاساپ, «كەپىلگە الىنعان ادامداردى» بوساتادى, زارداپ شەككەندەرگە كومەك كورسەتەدى.
سەربيا رەسپۋبليكاسى مەن حالىقارالىق قىزىل كرەست كوميتەتىنىڭ وكىلدەرى وقۋ-جاتتىعۋدىڭ باقىلاۋشىلارى رەتىندە قاتىسادى.