قازاقستان رەسپۋبليكاسى پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان بىشكەك قالاسىندا وتكەن «ەۋروپالىق وداق – ورتالىق ازيا» ەكونوميكالىق فورۋمىنىڭ جۇمىسىنا قاتىستى, دەپ جازادى Egemen.kz اقورداعا سىلتەمە جاساپ.
جيىن پاندەميادان كەيىنگى دامۋدىڭ كەلىسىلگەن ەكونوميكالىق شارالاردى, «جاسىل ەكونوميكا جانە ەنەرگەتيكاعا» كوشۋ, ايماق ەلدەرىنىڭ ەۋروپالىق وداقپەن ساۋدا-ەكونوميكالىق ىنتىماقتاستىقتى نىعايتۋ تاسىلدەرىن, كولىكتىك-لوگيستيكالىق ءوزارا بايلانىستاردى, تسيفرلاندىرۋدى, سونداي-اق بيزنەس ورتانى جاقسارتۋ ءۇشىن قۇقىقتىق رەتتەۋلەردى جەتىلدىرۋگە ارنالعان الاڭ بولىپ تابىلادى.
ءىس-شارا بارىسىندا ەرجان قازىحان «ەكولوگيالىق تەڭگەرىمدى, تۇراقتى, كليماتتىق جانە ەكولوگيالىق بەيتاراپ ەكونوميكاعا كوشۋگە» ارنالعان سەسسيادا ءسوز سويلەدى. مەملەكەت باسشىسىنىڭ ارناۋلى وكىلى ءوز سوزىندە ەلىمىزدىڭ وڭىردەگى كليماتتىق كۇن ءتارتىبىن ىلگەرىلەتۋدەگى رولىنە توقتالىپ, قازاقستاننىڭ 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى جوسپارى جونىندە ايتتى.
فورۋم اياسىندا ەرجان قازىحان اۋستريانىڭ ەۋروپالىق جانە حالىقارالىق ىستەر ءمينيسترى ميحاەل لينحارتپەن ەكىجاقتى كەزدەسۋ وتكىزدى. كەلىسسوز بارىسىندا تاراپتار ساياسي جانە ساۋدا-ەكونوميكالىق ىنتىماقتاستىقتىڭ قازىرگى جاعدايى مەن پەرسپەكتيۆالارىن, حالىقارالىق كۇن تارتىبىندەگى وزەكتى ماسەلەلەردى, سونىڭ ىشىندە اۋعانستانداعى جاعدايدى تالقىلادى. جوعارى دەڭگەيدەگى ساياسي ديالوگتى جانداندىرۋ تۋرالى ۋاعدالاستىققا قول جەتكىزىلدى. ەرجان قازىحان ەلدەرىمىز اراسىنداعى ديپلوماتيالىق قارىم-قاتىناستاردىڭ ورناعانىنا كەلەسى جىلى 30 جىل تولاتىنىن اتاپ ءوتىپ, ميحاەل لينحارتتى 2022 جىلى نۇر-سۇلتان قالاسىنا ساپارمەن كەلۋگە شاقىردى.