اقش قارۋلى كۇشتەرى قولباسشىلىعى تاپسىرلەگەن قىتايدىڭ اسكەري كۇشىن كەڭەيتۋ تۋرالى ەسەبى «قىتاي قاۋپى» تەورياسىن نەگىزدەۋ ماقساتىندا ۇسىنىلعان. بۇل تۋرالى قحر ءسىم رەسمي وكىلى ۆان ۆەنبين مالىمدەدى, دەپ حابارلايدى Egemen.kz.
ول ۆاشينگتوندى «ناقتى فاكتىلەردى بۇرمالادى جانە ءوز ىڭعايىنا ساي اقپارات تاراتتى» دەپ ايىپتادى. ونىڭ ايتۋىنشا, جاريالانعان قۇجات دەرەكتەرگە سايكەس كەلمەيتىن كورىنەدى. «شىن مانىندە بۇكىل الەم ءۇشىن قاۋىپتىڭ ەڭ ۇلكەن كوزى — اقش-تىڭ ءوزى», دەدى ۆەنبين.
قىتاي ءسىم وكىلىنىڭ ايتۋىنشا, ەلدەگى يادرولىق ارسەنال حالىقارالىق قاۋىپسىزدىكتى قامتاماسىز ەتۋ ءۇشىن قاجەت. «قىتايدىڭ اتوم قارۋى الەمنىڭ كەز كەلگەن ەلىنە قاۋىپ توندىرمەيدى», دەپ قورىتىندىلادى ءوز ويىن ۆەنبين.
بۇعان دەيىن پەنتاگون قىتاي ءوزىنىڭ ارسەنالىن مىڭ يادرولىق وقتۇمسىققا دەيىن كەڭەيتە الادى دەپ مالىمدەدى. اقش اسكەري كۇشتەرى قىتايدىڭ يادرولىق باعدارلاماسىنىڭ قازىرگى دامۋ قارقىنى اقش قورعانىس مينيسترلىگىنىڭ 2020 جىلى جاساعان بولجامدارىنان اسىپ تۇسەتىنىن اتاپ ءوتتى.