اسا اۋىر سالماقتا سىنعا ءتۇسىپ جۇرگەن قازاقستاندىق بوكسشى جان كوسوبۋتسكيدىڭ كەلەسى جەكپە-جەكتەگى قارسىلاسى انىقتالدى, دەپ حابارلايدى Egemen.kz.
گەرمانيالىق باق-تىڭ حابارلاۋىنشا, اسا اۋىر سالماقتاعى قازاق وعلانى 20 قاراشا كۇنى شارشى الاڭعا ورالادى ەكەن. «الىپتاردىڭ ورالۋى» دەپ اتالاتىن بوكس كەشىندە رينگكە كوتەرىلەتىن جان دومينيكان رەسپۋبليكاسىنىڭ نامىسىن قورعاپ جۇرگەن الەكسيس گارسيامەن قولعاپ تۇيىستىرەدى.
جاننىڭ ءوزى سەكىلدى بۇل جولعى قارسىلاسى دا ازىرگە جەڭىلىستىڭ ءدامىن تاتپاعان. گارسيا كاسىپقوي رينگتە 11 كەزدەسۋ وتكىزىپ, قارسىلاستارىنىڭ بارلىعىنان ايلاسىن اسىرعان. 7 جەكپە-جەگىن مەرزىمىنەن بۇرىن اياقتاعان. ال جان بولسا 16 شايقاستا مىسى باسىم بولىپ, 15 كەزدەسۋدى ۋاقىتىنان بۇرىن بىتىرگەن.