كەنشىلەر استاناسىندا كاسىپتىك-تەحنيكالىق كوللەدجدەردە وقيتىن ستۋدەنتتەر اراسىندا وتكەن جۇمىسشى ماماندىقتارىنىڭ بايقاۋىندا 13 وقۋ ورنىنان 40-تان اسا تالاپتى جاس باق سىنادى.
«دۇرىس تاڭداۋ جاسا» الەۋمەتتىك جوباسى اياسىنداعى اتالعان ءىس-شارانى ۇيىمداستىرۋشى قاراعاندى جاستار رەسۋرستىق ورتالىعىنىڭ باسشىسى سىمبات اۋباكىروۆا بايقاۋدى وتكىزۋدەگى باستى ماقسات جۇمىسشى ماماندىقتارىنىڭ بەدەلىن ارتتىرۋ, جۇمىسشى جاستاردى وقىتۋ جانە قايتا دايارلاۋ بويىنشا ماماندىقتى دۇرىس تاڭداۋدى, سونىمەن بىرگە مەملەكەتتىك باعدارلامالاردى ناسيحاتتاۋ ەكەنىن ايتادى.
– «دۇرىس تاڭداۋ جاسا» جوباسىن «قاراعاندى وبلىسىنىڭ جۇمىسشى جاستار وداعى» قوعامدىق بىرلەستىگى مەملەكەتتىك الەۋمەتتىك تاپسىرىس اياسىندا جۇزەگە اسىرۋدا. جوبانىڭ ماقساتتى توبى – وقۋشىلار, كاسىپتىك-تەحنيكالىق كوللەدجدەردىڭ ستۋدەنتتەرى, NEET ساناتىنداعى جاستار, – دەيدى س.اۋباكىروۆا.
«دانەكەرلەۋ ءىسى», «عيماراتتار مەن قۇرىلىستاردى سالۋ جانە پايدالانۋ», «تاماقتاندىرۋدى ۇيىمداستىرۋ», «شاشتاراز-ستيليست» جانە «شاشتاراز-مودەلەر» ماماندىقتارى بويىنشا سايىسقان ۇمىتكەرلەردىڭ ونەرىنە قۇرامىنا قىزمەتتىڭ جوعارىدا اتالعان تۇرلەرىنىڭ كاسىپقويلارى, قالالىق ءماسليحات دەپۋتاتتارى, سىبايلاس جەمقورلىققا قارسى ءىس-قيمىل جونىندەگى وبلىستىق ارنايى مونيتورينگتىك توپتىڭ مۇشەلەرى جانە ۇەۇ وكىلدەرى ەنگەن كوميسسيا تورەلىك جاسادى.
بايقاۋ قورىتىندىسىندا قاراعاندى تەحنيكا-قۇرىلىس كوللەدجىنىڭ ستۋدەنتى داۋرەنبەك سوۆەت «عيماراتتار مەن قۇرىلىستاردى سالۋ جانە پايدالانۋ» ماماندىعى بويىنشا, قاراعاندى يندۋستريالدى-تەحنولوگيالىق كوللەدجىنىڭ ستۋدەنتى دالير سۋفانكۋلوۆ «تاماقتاندىرۋدى ۇيىمداستىرۋ» ماماندىعى, قاراعاندى تاۋ-كەن يندۋستريالىق كوللەدجىنىڭ ستۋدەنتى اسىلجان زەينەلكوبدەن «دانەكەرلەۋ ءىسى» ماماندىعى, قاراعاندى تەحنولوگيا جانە سەرۆيس كوللەدجىنىڭ ستۋدەنتى الەكساندرا ەروحينا «شاشتاراز-ستيليست» ماماندىعى جانە قاراعاندى كاسىپتىك-تەحنيكالىق كوللەدجىنىڭ ستۋدەنتى اناستاسيا جمايلوۆا «شاشتاراز-مودەلەر» ماماندىعى بويىنشا جەڭىمپاز بولىپ تانىلدى.
ۇزدىك اتانعان ستۋدەنتتەر سەرتيفيكاتتارمەن, ديپلومدارمەن جانە ەستەلىك سىيلىقتارمەن ماراپاتتالدى.