2021 جىلعى 1 قاراشادا گلازگو قالاسىندا كليماتتىڭ وزگەرۋى تۋرالى بۇۇ نەگىزدەمەلىك كونۆەنتسياسى تاراپتارىنىڭ 26-شى كونفەرەنتسياسىندا ورتالىق ازيا پاۆيلونىنىڭ رەسمي اشىلۋى ءوتتى, دەپ حابارلايدى Egemen.kz.
حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى ءباسپاسوز قىزمەتىنىڭ مالىمەتىنشە, قازاقستاندىق تاراپتان حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى ديرەكتورلار كەڭەسىنىڭ توراعاسى دانيار ەرەنچينوۆ قۇتتىقتاۋ ءسوز سويلەدى, ول كليمات جانە تومەن كومىرتەكتى دامۋ سالاسىنداعى ماقساتتارعا قول جەتكىزۋ ءۇشىن ورتالىق ازيا ەلدەرىنىڭ كۇش-جىگەرىن بىرىكتىرۋدىڭ ماڭىزدىلىعىنا توقتالدى.
«بۇگىن گلازگودا ورتالىق ازيا ەلدەرىنىڭ ورتاق ءۇيى اشىلدى. بۇل ۇيدە ءبىز بۇگىن جاھاندىق كليماتتىق كونفەرەنتسيا اياسىندا بۇكىل الەمگە ءوزىمىزدىڭ كليماتتىق كۇن ءتارتىبىمىز جانە ەلدەرىمىزدىڭ بىرىڭعاي ۇستانىمى تۋرالى ايتىپ بەرۋ ءۇشىن جينالىپ وتىرمىز. سونداي-اق, بۇل ءبىزدىڭ وڭىردەگى كورشى ەلدەر اراسىندا وزىق تاجىريبە الماسۋ الاڭىنا اينالماق», دەپ ناقتىلادى ەرەنچينوۆ.
ورتالىق ازيا ەلدەرى ءۇشىن الداعى كونفەرەنتسيا تاريحي ءىز قالدىرماق, سەبەبى ولار العاش رەت بىرىڭعاي شوعىرلاندىرىلعان وڭىرلىك مالىمدەمەمەن ءسوز سويلەيدى. نەگىزگى حابار ورتالىق ازيا مەملەكەتتەرىنىڭ ۇكىمەتتەرىنە وڭىردەگى كليماتتىق داعدارىستىڭ الدىن الۋ جونىندەگى ۇلتتىق جانە وڭىرلىك باعدارلامالاردى كۇشەيتۋگە شاقىرۋدان تۇرادى.
ەسكە سالا كەتسەك, گلازگودا ءوتىپ جاتقان كليماتتىڭ وزگەرۋى جونىندەگى 26-شى كونفەرەنتسيا الەمدىك اۋقىمداعى ەڭ ماڭىزدى وقيعا بولىپ تابىلادى, ونىڭ جۇمىسىنا الەمنىڭ 100-دەن استام مەملەكەت جانە ۇكىمەت باسشىلارى قاتىسادى.