شىعىستا ءوتىپ جاتقان «دالا ديدارى» ونەر فەستيۆالى تالانتتاردى تانىتاتىن, ونەردى ورگە سۇيرەيتىن تىڭ جوبالاردىڭ ءبىرى. وبلىستىق ونەر مۋزەيى قابىرعاسىندا ۇيىمداستىرىلعان بۇل جولعى ەستافەتانى جارما اۋدانى مەن كۋرچاتوۆ قالاسىنىڭ قىلقالام شەبەرلەرى, ءانشى-كۇيشىلەرى جالعاستىردى.
ادەتتەگىدەي وسكەمەن اسپانىندا ءان اۋەلەدى, كۇي كۇمبىرلەدى. قىلقالام شەبەرلەرى كوزدىڭ جاۋىن الاتىنداي كارتينالارىن قاز-قاتار ءتىزىپ, قابىرعاعا ءىلدى. اۋەلدە كۋرچاتوۆ قالاسىن اتومشىلار مەن فيزيكتەردىڭ قالاسىنداي ەلەستەتەتىنبىز. سويتسەك, وتىز جىل ىشىندە رۋحاني ورتاسى قالىپتاسقان قالاعا اينالىپتى. كۇمىس كومەي ءانشىسى دە, داۋلەسكەر كۇيشىسى دە بار. قارا سوزدەن ولەڭ ورەتىن اقىنجاندى جاستار دا ءوسىپ كەلەدى.
كۋرچاتوۆتىڭ كورمەسىنە تويلاس قيناياتتىڭ كوركەم پەيزاجدارى, تاتيانا كيريللوۆانىڭ مولدىرەتىپ جازعان اكۆارەل جۇمىستارى قويىلدى. سونداي-اق ەلەنا دەمەنتەۆا مەن گيمينگۋل اداكاننىڭ كەستەلەگەن كارتينالارى دا كورەرمەن كوزىنىڭ جاۋىن الدى. جالپى العاندا, كۋرچاتوۆتىقتار سەكسەننەن استام جۇمىس ۇسىنعان ەكەن.
– ءبىز جۇمىستىڭ از عانا بولىگىن الىپ كەلدىك. قازىرگى ۋاقىتتا كۋرچاتوۆتا ونەر سالاسى دامىپ كەلەدى. وسىنداي كورمەلەر جۇيەلى تۇردە وتكىزىلىپ تۇرسا, ونەرپازداردىڭ شىڭدالۋىنا زور مۇمكىندىك, – دەيدى كۋرچاتوۆ قالاسىنىڭ №2 ورتا مەكتەبىنىڭ كوركەم ەڭبەك مۇعالىمى ايگەرىم توكەنوۆا.
«دالا ديدارى» بايقاۋىنا جارمالىقتار تىپتەن ەرەكشە دايىندىقپەن كەلىپتى. مۋزەيدىڭ كىرەبەرىسىنە قازاقتىڭ اقباس بۇقاسىنىڭ ءمۇسىنىن قويىپ, كوپشىلىكتى تاڭعالدىردى. نەگە دەگەندە, بۇل بىرەگەي جانۋار جارما اۋدانىنىڭ, شىعىس قازاقستاننىڭ مال شارۋاشىلىعى سالاسىنىڭ تەڭدەسسىز برەندى دەسەدى.
– قازاقتىڭ اقباس سيىرى جارما اۋدانىندا وسىرىلەدى. سوندىقتان وسى ءمۇسىن كورمەنىڭ سيمۆولىنداي بولسىن دەپ جاسادىم, – دەيدى سۋرەتشى, ءمۇسىنشى مانات ەركىنبەكوۆ.
جالپى, جارما اۋدانى فەستيۆالگە 50-دەن استام ەكسپونات اكەلدى. مايلى بوياۋمەن جازىلعان كارتينالاردىڭ ىشىندە سۇلۋسارى اۋىلىنىڭ سۋرەتشىسى ءمادي قايىرحاننىڭ جۇمىستارىنا كوپشىلىك تاڭدانىپ, جىلى لەبىزدەرىن ءبىلدىرىپ جاتتى. ايتا كەتەرلىگى ونەر مۋزەيىندە ءوتىپ جاتقان بۇل كورمە 14 قاراشاعا دەيىن جالعاسادى. ال بەينەلەۋ ونەرى بايقاۋىنىڭ جەڭىمپازدارىن 23 جەلتوقساندا «دالا ديدارى» فەستيۆالىنىڭ قورىتىندى كورمەسىنىڭ اشىلۋىندا انىقتالادى.
شىعىس قازاقستان وبلىسى