باتىس قازاقستان ءوڭىرى – قۇرمانعازى, داۋلەتكەرەي, دينا, سەيتەك سىندى كۇيشىلەر ومىرگە كەلگەن ونەرلى ولكە. ۇلتتىق مۋزىكا ونەرىندە ەسىمى وشپەستەي ساقتالاتىن بۇل ەسىمدەردىڭ لايىقتى ءىزباسارلارى بار ما؟ جاقىندا ورال قالاسىندا وتكەن جاس كۇيشىلەر سايىسى وسى ساۋالعا جاۋاپ بەرگەندەي, دەپ جازادى Egemen.kz.
باتىس قازاقستان وبلىسىنىڭ جاستار ساياساتى ماسەلەلەرى باسقارماسى قولداپ, «عاسىر» جاستار قوعامدىق بىرلەستىگى ۇيىمداستىرعان جاس كۇيشىلەر سايىسىنا قاتىسۋشىلار از بولمادى. وسىنىڭ ءوزى كوڭىلگە قۋانىش ۇيالاتتى. جاقىندا عانا پايدالانۋعا بەرىلگەن اقشاڭقان «اتامەكەن» ونەر ورداسىندا وتكەن كۇي سايىسى قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويىنا ورايلاستىرىلدى. شارا ەلىمىزدەگى كۇيشىلىك ونەردى وسكەلەڭ ۇرپاققا, ونەرسۇيەر جۇرتشىلىققا كەڭىنەن ناسيحاتتاۋ, جاس تالانتتار مەن شەبەر ورىنداۋشىلاردى انىقتاۋ, دارىندى ونەرپازداردىڭ كاسىبي شەبەرلىكتەرىن ارتتىرۋ ماقساتىندا ۇيىمداستىرىلعان. سايىس بارىسىندا جاستارعا ۇلتتىق قۇندىلىقتاردى ناسيحاتتاۋ ماقساتىندا ارنايى ۇلتىق قولونەر تۇرلەرىنەن كورمە ۇسىنىلدى.
«كۇي – تەكتىلىك تەرەڭى!» اتتى وبلىستىق جاس كۇيشىلەر سايىسى 2 كەزەڭنەن تۇردى. ىرىكتەۋ كەزەڭىنەن ىركىلمەي وتكەن ەڭ ۇزدىك جاس كۇيشىلەر فينالدىق باسەكەدە سايىسقا ءتۇستى. سايىس جەڭىمپازدارى 14-18 جانە 19-29 جاس ارالىعىنداعى ەكى توپ بويىنشا انىقتالدى.
سونىمەن, سايىس ناتيجەسىندە 14-18 جاس ارالىعى بويىنشا جۇلدەلى I ورىندى – ناۋرىزبەك كۇزەنباەۆ, II ورىندى – ەرنەست قايىرجانوۆ, III ورىندى – ايزادا قيباشوۆا يەلەندى. ەرەكشە ونەرىمەن كوزگە تۇسكەن جۇلدىز ناريمانوۆا مەن ءمادينا قادىرعاليەۆاعا «كورەرمەن كوزايىمى» جۇلدەلەرى بۇيىردى. ال 19-29 جاس ارالىعى بويىنشا I ورىن سىيلىعى قايرات بايقۇتتىعا بۇيىردى. جۇلدەلى ءىى-III ورىندى قىدىرنياز ەگىنعالي مەن تەمىرلان سىراليەۆ ءوزارا ءبولىستى. «كورەرمەن كوزايىمى» اتالىمىنا بەكزات رامازان مەن نۇراي ۇمبەتوۆا لايىق دەپ تانىلدى. سايىس جەڭىمپازدارىنا ارنايى ديپلوم, ەستەلىك سىيلىق جانە قارجىلاي سەرتيفيكات تابىس ەتىلدى.