حالىق ساناعىنا الماتى قالاسىنىڭ 2 ميلليوننان استام تۇرعىنى قاتىستى, دەپ حابارلايدى Egemen.kz.
ۇلتتىق ستاتيستيكا بيۋروسىنىڭ ءباسپاسوز قىزمەتى ۇسىنعان دەرەككە سايكەس, الماتى تۇرعىندارىنىڭ سانى بۇگىندە 2 005 496 ادامدى قۇرايدى.
«بۇگىنگى تاڭدا الماتى قالاسىنىڭ جالپى تۇرعىنىنىڭ 2 ملن 86 مىڭ 769-ى ساناقتان ءوتتى. بيىلعى جىلدىڭ 24 قازانىنداعى جاعداي بويىنشا, ونلاين ساناقتان 626 605 ادام ءوتتى, 25 قازانداعى جاعداي بويىنشا, 1 462 935 الماتىلىق وفلاين رەجيمدە ءوتتى», دەپ ءتۇسىندىردى ۆەدومستۆودان.
الماتىنىڭ حالىق ەڭ تىعىز قونىستانعان اۋدانى – بوستاندىق اۋدانى, وندا 361 609 ادام تۇرادى. تۇرعىنداردىڭ ەڭ از سانى جاڭا ناۋرىزباي اۋدانىندا تۇرادى – 159 115 ادام.
ايتا كەتەيىك, قازاقستاندا حالىق ساناعىنان ونلاين ءوتۋ مەرزىمى ۇزارتىلدى. ساناق ساۋالدارىنا ارنايى sanaq.gov.kz سايتى, E-Gov پورتالى ارقىلى تىركەلىپ نەمەسە Aitu موبيلدىك قوسىمشاسى ارقىلى جاۋاپ بەرۋگە بولادى. ونلاين ءوتۋ مۇمكىندىگى حالىق ساناعى اياقتالعانعا دەيىن قولجەتىمدى بولماق.
1 قازاننان باستاپ ينتەرۆيۋەرلەر ءۇي-ءۇيدى ارالاۋدى باستادى. ونلاين وتكەن رەسپوندەنتتەر تەلەفونعا كەلگەن SMS-حابارلامانى ينتەرۆيۋەرلەرگە كورسەتۋى ءتيىس. ولار ساۋالنامادان قايتا وتپەيدى.