13-14 اقپاندا قازاقستان رەسپۋبليكاسىنىڭ پارلامەنتتىك دەلەگاتسياسى ەقىۇ پارلامەنتتىك اسسامبلەياسىنىڭ ۆەنادا وتكەن 13-ءشى قىسقى وتىرىسىنا قاتىستى. قازاقستان دەلەگاتسياسىنىڭ قۇرامىنا سەناتورلار يكرام ادىربەكوۆ پەن سەرىك نوگەربەكوۆ, سونداي-اق, ءماجىلىس دەپۋتاتى سۆەتلانا بىچكوۆا مەن جامبىل احمەتبەكوۆ ەنگەن بولاتىن, دەپ حابارلادى سەناتتىڭ ءباسپاسوز قىزمەتى.
ەقىۇ پارلامەنتتىك فورۋمىندا پارلامەنتشىلەر اسسامبلەيانىڭ جالپى ءۇش كوميتەتىنىڭ (ساياسي ماسەلەلەر جانە قاۋىپسىزدىك; ەكونوميكالىق ماسەلەلەر, عىلىم, تەحنولوگيا جانە قورشاعان ورتا; دەموكراتيا, ادام قۇقىقتارى جانە گۋمانيتارلىق ماسەلەلەر) جۇمىسىنا, كوميتەتتەردىڭ بىرلەسكەن وتىرىسىنا, سونداي-اق, ەقىۇ كەڭىستىگىندەگى ەكسترەميزمگە, راديكاليزمگە جانە كسەنوفوبياعا قارسى ءىس-قيمىل جانە ۋكرايناداعى قازىرگى جاعدايعا ارنالعان ماسەلەلەر تالقىلانعان پىكىرسايىستارعا قاتىستى.
ساياسي ماسەلەلەر جانە قاۋىپسىزدىك كوميتەتىنىڭ كۇن تارتىبىندەگى «قارۋلى كۇشتەرگە جانە قاۋىپسىزدىك كۇشتەرىنە پارلامەنتتىك باقىلاۋ» نەگىزگى ماسەلەنى تالقىلاۋ اياسىندا سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى ي.ادىربەكوۆ قازاقستان پرەزيدەنتى ن.ءا.نازارباەۆتىڭ مەملەكەتتىڭ قاۋىپسىزدىك جانە سىرتقى ساياسات سالاسىنداعى ۇزاقمەرزىمدى دامۋىن بەلگىلەگەن «قازاقستان-2050» ستراتەگياسىنىڭ ماڭىزىن اتاپ ءوتتى.
«ستراتەگيادا, سونداي-اق, قازاقستان سىرتقى ساياساتىنىڭ جاڭا تۇجىرىمداماسىندا حالىقارالىق جانە ايماقتىق قاۋىپسىزدىكتى نىعايتۋ, قۇقىق قورعاۋ جۇيەلەرىن رەفورمالاۋ مەن قورعانىس قابىلەتىن ودان ءارى ارتتىرۋ باسىمدىقتار رەتىندە بەلگىلەندى», دەپ اتاپ ءوتتى سەناتور. بۇل تۇرعىدا, ي.ادىربەكوۆتىڭ پىكىرىنشە, قازاقستان قارۋلى كۇشتەرى وفيتسەرلەرىن بۇۇ ميسسيالارىنىڭ قۇرامىنا جىبەرۋ تۋرالى مەملەكەت باسشىسى شەشىمىنىڭ ەرەكشە ءمانى بار. ونى وتكەن جىلعى جەلتوقساندا ەل پارلامەنتى ءبىراۋىزدان قولداعان بولاتىن. «بۇل حەلسينكي قورىتىندى اكتىسىنىڭ رۋحىندا ءبىزدىڭ ەلىمىزدىڭ ايماقتىق قاۋىپسىزدىكتى نىعايتۋدى قامتاماسىز ەتۋگە قوسقان كەزەكتى ۇلەسى بولادى», دەدى ول.
ەكونوميكالىق ماسەلەلەر, عىلىم, تەحنولوگيا جانە قورشاعان ورتا كوميتەتىنىڭ وتىرىسىندا ءسوز العان دەپۋتات س.نوگەربەكوۆ ورتالىق ازياداعى سۋ رەسۋرستارى ماسەلەلەرىندە ءوزارا ءتيىمدى ءىس-قيمىل تەتىكتەرىن ازىرلەۋ ءۇشىن ەقىۇ الەۋەتىن پايدالانۋدىڭ ماڭىزدى ەكەنىن اتاپ ءوتتى. ايماقتاعى ماڭىزدى سۋ-ەكولوگيالىق ماسەلەلەردى تەڭگەرىمدىلىك جانە سىندارلى تۇردە شەشۋ جونىندەگى ىنتىماقتاستىقتىڭ ەرەكشە تەتىگى رەتىندە ول ارالدى قۇتقارۋ حالىقارالىق قورىنىڭ قىزمەتىن اتاپ ءوتتى.
«استانا ەكونوميكالىق فورۋمى كۇندەرىندە قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ باستاماسى بويىنشا دۇنيەجۇزىلىك داعدارىسقا قارسى كونفەرەنتسيا ەكىنشى جىل وتۋدە. بىرىككەن ۇلتتار ۇيىمى باس اسسامبلەياسىنىڭ قولداۋىمەن جەتەكشى ەلدەردىڭ, حالىقارالىق ۇيىمداردىڭ, عىلىمي-زەرتتەۋ ينستيتۋتتارىنىڭ جانە ازاماتتىق قوعامداردىڭ وكىلدەرى ەكونوميكالىق قاۋىپسىزدىكتى جانە تۇراقتى دامۋدى قامتاماسىز ەتۋدىڭ جولدارىن تالقىلاۋدا», دەپ اتاپ ءوتتى س.نوگەربەكوۆ. ول ەقىۇ پارلامەنتشىلەرىن «G-global» كوممۋنيكاتيۆتىك الاڭىندا الەمدىك داعدارىسقا قارسى جوسپار جوباسىن تالقىلاۋعا, سونداي-اق, بيىلعى مامىر ايىندا وتەتىن VII استانا ەكونوميكالىق فورۋمىنا جانە داعدارىسقا قارسى ءىى كونفەرەنتسياعا قاتىسۋعا شاقىردى.
قازاقستاندىق دەپۋتاتتار ەقىۇ-عا قاتىسۋشى ەلدەردىڭ پارلامەنتتىك دەلەگاتسيالار مۇشەلەرىمەن جانە اسسامبلەيا باسشىلىعىمەن كەزدەسۋلەر وتكىزىپ, ەقىۇ پارلامەنتتىك اسسامبلەياسى اياسىندا ۇلتتىق دەلەگاتسيالاردىڭ ءوزارا ءىس-قيمىلىنداعى وزەكتى ماسەلەلەردى تالقىلادى.
پارلامەنتشىلەردىڭ ايماقتىق ءىرى بىرلەستىگىنىڭ ءبىرى بولىپ تابىلاتىن ەقىۇ پا قىسقى سەسسياسىنىڭ جۇمىسىنا 50-دەن استام ەلدەن كەلگەن 270 دەپۋتات قاتىستى.