ۇلتتىق بانكتىڭ 2014 جىلعى 11 اقپانداعى قازاقستان ۆاليۋتاسىنىڭ باعامىن وزگەرتۋ تۋرالى شەشىمى دەر كەزىندە قابىلدانعان ەكونوميكالىق ىقپالدى شارا دەپ ەسەپتەيمىن. ەكونوميكامىزدىڭ ءتيىمدى جۇمىس ىستەۋى ءۇشىن وتاندىق تاۋار وندىرۋشىلەردىڭ جاعدايىنا باسىمدىق بەرۋ باستى مىندەت بولىپ تابىلماق. نەگىزىنەن ەكسپورتتىق باعىتتا جۇمىس ىستەيتىن ءبىزدىڭ «قازاتومپروم» كومپانياسى ءۇشىن بۇل تىپتەن ءتيىمدى بولىپ وتىر. ويتكەنى, تەڭگەنىڭ قولدان جاسالعان تۇراقتىلىعى ءبىزدىڭ تاۋارلارىمىزدىڭ الەمدىك رىنوكتاعى باسەكەلەستىگىنىڭ تومەندەۋىنە اكەپ سوقتى. تەڭگە باعامىنىڭ دوللارعا قاراعاندا بىردەن 20 پايىزعا تومەندەتىلۋى ءبىزدىڭ ەكسپورتقا شىعاراتىن شيكىزاتىمىزدان تۇسەتىن پايدانى ارتتىراتىن بولادى.
سونىمەن بىرگە, تەڭگە باعامىنىڭ تومەندەۋى 2011 جىلى ناۋرىز ايىندا بولعان «فۋكۋسيما» اتوم ەلەكتر ستانساسىنداعى اپاتتان كەيىن قالىپتاسقان تابيعي ۋران شيكىزاتى باعاسىنىڭ تومەندەۋىنەن كەلىپ وتىرعان كەرى اسەردىڭ ازايۋىنا دا ىقپال ەتەتىن بولادى. قازىرگى تاڭدا كومپانيا باسشىلىعىنىڭ باستى مىندەتى تاۋاردىڭ وزىندىك قۇنىنا اسەر ەتەتىن شيكىزات, قىزمەت جانە دە باسقا ماتەريالداردىڭ نەگىزسىز قىمباتتاپ كەتۋىنە جول بەرمەۋ بولىپ تابىلادى. ءبىزدىڭ كاسىپورىنعا قاتىستى الىس-بەرىس كەلىسىمشارتتارى جىل باسىندا جاسالىپ قويدى. سوندىقتان تاۋار وندىرۋگە قاجەتتى شيكىزات جانە باسقا دا ماتەريالداردىڭ باعاسىندا ايتارلىقتاي اۋىتقۋشىلىقتار بولمايدى.
الەمدە قالىپتاسقان احۋالعا بايلانىستى تەڭگە باعامىن وزگەرتۋ ەلىمىزدىڭ ەكسپورتتىق الەۋەتىن ارتتىرىپ, وتاندىق تاۋار وندىرۋشىلەردىڭ جاعدايىن جاقسارتاتىن بولادى. ەندى ەلىمىزدىڭ كاسىپكەرلەرى وزدەرى وندىرەتىن تاۋارلاردىڭ وزىندىك قۇنىن تومەندەتىپ, بارىنشا مول تابىس تابۋعا بەت بۇرۋى قاجەت. الەۋمەتتىك جاۋاپكەرشىلىككە باسىمدىق بەرەتىن كومپانيا رەتىندە ءبىزدىڭ اكتسيونەرلىك قوعام الداعى ۋاقىتتا ەڭبەككەرلەرىنىڭ ماتەريالدىق جاعدايىن جاقسارتۋ جولىندا ناقتى شارالاردى جۇزەگە اسىراتىن بولادى.
ايدار اريفحانوۆ,
«قازاتومپروم» اق باسقارماسى
توراعاسىنىڭ ورىنباسارى.