قازاقستان 2022 جىلى تمد ەلدەرىنىڭ ءبىلىم بەرۋ سالاسىنداعى ىنتىماقتاستىق كەڭەسىنە توراعالىق ەتەدى. سونداي-اق ەلىمىزدە تمد-عا قاتىسۋشى مەملەكەتتەردىڭ مۇعالىمدەرى مەن ءبىلىم بەرۋ سالاسى قىزمەتكەرلەرىنىڭ VII سەزى وتەدى, دەپ حابارلايدى Egemen.kz.
مۇنداي شەشىم بيىل ارمەنيادا وتكەن تمد ەلدەرىنىڭ ءبىلىم بەرۋ سالاسىنداعى ىنتىماقتاستىق كەڭەسى وتىرىسىنىڭ قورىتىندىسى بويىنشا ءبىراۋىزدان قابىلداندى. وعان قازاقستان, رەسەي, قىرعىزستان, وزبەكستان, ارمەنيا, بەلارۋس, تاجىكستاننان كەڭەس مۇشەلەرى, سونداي-اق تمد اتقارۋشى كوميتەتىنىڭ وكىلدەرى مەن باسقا دا شاقىرىلعان تۇلعالار قاتىستى.
قازاقستاننىڭ اتىنان قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا باردى. تالقىلاۋ بارىسىندا كەڭەسكە قاتىسۋشى ەلدەر قازاقستان رەسپۋبليكاسى ءبىلىم جانە عىلىم مينيسترلىگىنىڭ جوعارى جانە ورتا ءبىلىم بەرۋ جۇيەسىندەگى جۇمىسىن اتاپ ءوتتى.
ماسەلەن, جاڭا ءبىلىم بەرۋ باعدارلامالارىن ەنگىزۋ, اكادەميالىق ادالدىقتى قامتاماسىز ەتۋ شەڭبەرىندە قابىلدانعان زاڭنامالىق نورمالار, پەداگوگتەردىڭ جالاقىسىن جوعارىلاتۋ, ءبىلىم بەرۋ جۇيەسىندەگى كادرلاردىڭ بىلىكتىلىگىن ارتتىرۋ بويىنشا جۇمىس, سونداي-اق ءبىلىم بەرۋ پروتسەسىندە تسيفرلىق تەحنولوگيالاردى پايدالانۋ ءۇشىن زاڭنامالىق نورمالاردى جەتىلدىرۋ.
«وتىرىستا كۇن تارتىبىندەگى 19 ماسەلە تالقىلاندى. قاتىسۋشى ەلدەردىڭ ءبىلىم بەرۋ سالاسىنداعى ىنتىماقتاستىعى بويىنشا مەملەكەتارالىق باعدارلامالار مەن جوسپارلارى بەكىتىلدى. ەندى مەملەكەتتەر ءبىلىم الۋشىلار جانە عىلىمي-پەداگوگيكالىق قىزمەتكەرلەر اراسىندا ءوزارا الماسۋ بويىنشا جۇمىستى كەڭەيتىپ, جوعارى وقۋ ورىندارى اراسىنداعى ىنتىماقتاستىقتى ارتتىرادى, سونىمەن بىرگە ءبىلىم بەرۋ سالاسىنداعى ءوزارا ءىس-قيمىلدىڭ مەملەكەتارالىق باعدارلامالارىن جاساسادى. سونداي-اق ينتەرنەت-رەسۋرستاردى پايدالانا وتىرىپ, مەملەكەتارالىق اقپارات الماسۋ اۋقىمىن كەڭەيتۋ, ءبىلىم بەرۋ باعدارلامالارىن ىلگەرىلەتۋ بويىنشا بىرلەسكەن ءىس-شارالار وتكىزۋ تۋرالى شەشىم قابىلداندى», دەدى ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ توراعاسى گۇلزات كوبەنوۆا.
قازاقستاندا وتەتىن تمد-عا قاتىسۋشى مەملەكەتتەردىڭ مۇعالىمدەرى مەن ءبىلىم بەرۋ سالاسى قىزمەتكەرلەرىنىڭ VII سەزىنىڭ تاقىرىبى پاندەميادان كەيىنگى كەزەڭدەگى ءبىلىم بەرۋ پروتسەسىنىڭ جاڭا بولمىسى مەن ترانسفورماتسياسىنا ارنالادى.