قازاقستاندا ەلەكتروساموكاتتارعا ءتيىستى رەگلامەنتتەر, ستاندارتتار مەن تالاپتار ازىرلەۋ ۇسىنىلدى. سەناتور نۇرتورە ءجۇسىپ قر پرەمەر-ءمينيسترىنىڭ ورىنباسارى رومان سكليارعا دەپۋتاتتىق ساۋال جولدادى, دەپ حابارلايدى Egemen.kz.
سەناتتىڭ جالپى وتىرىسىندا دەپۋتات قازىر قازاقستاننىڭ بارلىق ءىرى قالالارىندا جىلدام جۇرەتىن سكۋتەرمەن بەتپە-بەت سوقتىعىسىپ قالۋعا بولاتىنىن اتاپ ءوتتى.
«وزدىگىنەن جۇرەتىن ماشينالاردىڭ جىلدامدىعى وتە جوعارى جانە ول تروتۋاردىڭ كەز كەلگەن نۇكتەسىندە پايدا بولۋى مۇمكىن. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى مۇنداي قۇرىلعىلاردىڭ قاتىسۋىمەن بولعان وقيعالاردىڭ رەسمي ستاتيستيكاسىن جۇرگىزبەيدى. ەلەكتروساموكاتتار, ساموكاتتار, گيروسكۋتەرلەر قازىر ازاماتتاردىڭ ومىرىنە قاۋىپ توندىرەتىن جاعدايعا تاپ بولدى. ۆەدومستۆولىق دەرەكتەر بويىنشا 8 ايدا وسىنداي قۇرىلعىلاردىڭ قاتىسۋىمەن 387 وقيعا تىركەلدى, 25 ادام قازا تاپتى, 411 ادام جاراقات الدى», دەدى نۇرتورە ءجۇسىپ.
ول «جول قوزعالىسى تۋرالى» قر زاڭىنىڭ 64-بابىنا سايكەس اتالعان قۇرىلعىلار ۋاكىلەتتى ورگاندا مەملەكەتتىك تىركەۋگە جاتپايتىنىن ايتتى.
«قالاي بولعاندا دا, جىلدامدىعى ءاۆتوموبيلدىڭ جىلدامدىعىنا پروپورتسيونالدى ەلەكتروساموكاتتار كولىك قۇرالدارىنىڭ كەز كەلگەن ساناتىنا جاتپايدى. قازىرگى ۋاقىتتا نورماتيۆتىك اكتىلەردە وسى تيپتەگى قۇرىلعىلاردىڭ جىكتەلۋى جوق. ىشكى ىستەر مينيسترلىگى ەلەكتر ساموكاتتارىن كەز كەلگەن كولىك قۇرالىنا, مىسالى, موپەدتەرگە نەمەسە سكۋتەرلەرگە تاعايىنداۋ بىرقاتار تەحنيكالىق ايىرماشىلىقتار مەن پايدالانۋ ەرەكشەلىكتەرىنە بايلانىستى مۇمكىن ەمەس ەكەنىن ايتادى», دەدى دەپۋتات.
كەدەن وداعىنىڭ دوڭعالاقتى كولىك قۇرالدارىنىڭ قاۋىپسىزدىگى تۋرالى تەحنيكالىق رەگلامەنتىنە سايكەس جالپىعا ورتاق پايدالانىلاتىن جولداردا پايدالانۋعا ارنالعان كەز كەلگەن كولىك قۇرالى جاقىن جانە الىس جارىقپەن, جارىق شاعىلىستىرعىشتارمەن, بۇرىلۋ كورسەتكىشتەرىمەن, گاباريتتى جارىقتاندىرۋمەن, تەجەگىش سيگنالىمەن, سپيدومەترمەن جانە ءبۇيىر اينالارمەن جاراقتاندىرىلۋى ءتيىس.
«بىزدە ولاردىڭ ەشقايسىسى جوق, قالاي؟ كورسەتىلگەن قۇرىلعىلارعا ءتيىستى جىكتەۋدىڭ جانە تەحنيكالىق تالاپتاردىڭ بولماۋى مۇنداي قۇرالداردى باسقاراتىن تۇلعالاردىڭ قۇقىقتارى مەن مىندەتتەرىن زاڭنامالىق تۇردە بەكىتۋگە مۇمكىندىك بەرمەيدى. سونداي-اق تەحنيكالىق رەتتەۋدىڭ قاجەتتى ادىستەرىن, نارىقتاعى اينالىم نەمەسە پايدالانۋعا بەرۋ قاعيدالارىن, قاۋىپسىزدىك تالاپتارىن, سايكەستىكتى باعالاۋ راسىمدەرىن, تاڭبالاۋدىڭ بىرىڭعاي تالاپتارىن بەلگىلەۋ قاجەت. وسىعان بايلانىستى ەلەكتر ساموكاتتارىن اكەلۋ مەن قاۋىپسىز پايدالانۋدى قۇقىقتىق رەتتەۋ قاجەت دەپ سانايمىز», دەپ اتاپ ءوتتى سەناتور.
دەپۋتات ۇكىمەتتەن جوعارىدا اتالعان قۇرىلعىلاردى جىكتەۋ جانە زاڭنامالىق اكتىلەرگە ءتيىستى تۇزەتۋلەر ەنگىزۋ ماسەلەسىن جەدەلدەتۋدى سۇرادى.