ەسكەكاياقتى قۇستاردىڭ قاتارىنا جاتاتىن بۇل بىرقازان ادەتتە بالقاشتىڭ جاعالاۋىندا كەزدەسەدى ەكەن. ماڭايىندا كول تۇگىل, كولشىگى جوق بەلوۋسوۆكا اۋىلىنا قايدان كەلگەنى بەلگىسىز.
ءوندىرىسى دامىعان قالا ءتيپتى شاعىن كەنتتىڭ اينالاسى اڭ جورتىپ, قۇس شۋلايتىنداي جەر ەمەس. ال «قىزىل كىتاپتاعى» قوڭىر بىرقازان اۋىلدىڭ ءدال ورتاسىنا قالاي تاپ بولدى؟ تۇرعىنداردىڭ ءبىرى قيمىلسىز وتىرعان ەرەكشە قۇستى كورىپ قالىپ, پوليتسەيلەردى شاقىرتقان. كۇدىكتەنسە كەرەك. وتكەن جىلدارى شىعىستىڭ شەكاراسىنداعى اۋىلداردا قىزىل يەروگليفتى ءمور سوعىلعان كوگەرشىندەر كەزدەسكەن. سويتسەك, جارىسقا قاتىساتىن قولدىڭ كەپتەرلەرى ەكەن. توردان شىعىپ, شەكارا اسسا كەرەك.
قوڭىر بىرقازان كۇزگى كوشى-قون كەزىندە قاتارىنان قالىپ قويعان سەكىلدى. تاۋىپ العان ازاماتتاردىڭ ايتۋىنشا, ادامداردان قاشۋعا ءالى قالماعان. پوليتسەيلەر كەلە سالا, سيرەك قۇستى ساقتاپ قالۋ ءۇشىن ۆەتەريناريا قىزمەتكەرلەرىن شاقىرتقان. ولار وسكەمەندەگى ۆەتەرينارلىق كلينيكاعا الىپ كەتىپ, تەكسەرۋ, ەمدەۋ جۇمىستارىن جۇرگىزەتىندەرىن ايتقان.
ورنيتولوگ, ولكەتانۋشى بوريس ششەرباكوۆتىڭ ايتۋىنشا, «قىزىل كىتاپتاعى» بۇل بىرقازان دەنە تۇرقى جاعىنان ەڭ كىشكەنتايى. سالماعى ءارى كەتكەندە 4,5 كيلو عانا تارتادى. نەگىزگى قورەگى – بالىق. سۋقۇزعىندارمەن بىرگە اۋلايدى. الايدا سۋعا سۇڭگۋ قابىلەتى جوق. جەمىن سۋعا باسىن تىعىپ جىبەرىپ قانا تاۋىپ جەيدى.
ايتا كەتەرلىگى, بيىل جىل قۇسى بولىپ بىرقازان بەكىتىلگەن. قازاقستان بيوالۋاندىقتى ساقتاۋ قاۋىمداستىعى قازاقستاننىڭ قۇستاردى قورعاۋ وداعىمەن بىرلەسىپ, سيرەك قۇستارعا نازار اۋدارۋ ءۇشىن جىل سايىن «جىل قۇسى» اقپاراتتىق ناۋقانىن وتكىزىپ كەلەدى.