ەلگە ىندەت ەنگەلى دەنساۋلىق ساقتاۋ سالاسىنان اقساۋ دا بايقادىق, سەرپىلىستى دە كوردىك. كوۆيدتى جەڭۋ ءۇشىن بولىنگەن قارجىنى بولىسكە سالا الماي, بەرەكەسى قاشقان اق حالاتتىلاردىڭ دا بىتىسپەس داۋىن ءبىلىپ وتىرمىز. ءيا, بەتپەردە تاعۋدى ۇيرەنگەنىمىزبەن, ادامي «بەتپەردەلەر» شەشىلىپ قالىپ جاتتى. بۇل ءبىر بولەك تاقىرىپ... ال مەديتسيناداعى سەرپىلىس دەپ وتىرعانىمىز, وبلىس ورتالىعىنداعى اۋرۋحانالاردىڭ بىرقاتارى جوندەۋدەن ءوتىپ, توسەكتىك ورىندار سانى ارتتى. جاڭا قۇرىلعىلارمەن, جەدەل جاردەم كولىكتەرىمەن قامتىلدى. بىراق اۋرۋحاناعا اۋىرىپ بارعان پاتسيەنتتەرگە ورىن جوق كورىنەدى. بۇل ماسەلە الەۋمەتتىك جەلىدە كوتەرىلىپ, جۋرناليستەر قاۋىمىنىڭ نازارىن اۋدارعان.
كۇنى كەشە عانا اۋرۋحانالاردىڭ بوساعاسىنان اتتاي الماي تۇرعان ناۋقاستاردىڭ بەينەجازباسى تارادى. بوس داۋرىعۋ شىعار دەسەك, بەينەجازبادا ءبىر ەمەس, بىرنەشە دارىگەر ورىننىڭ جوقتىعىن اشىق ايتقان. سونىمەن قاتار وبلىستا جەدەل جاردەمنىڭ «تاسباقا ءجۇرىسى» دە ءجيى كوتەرىلەتىن پروبلەما.
– قازاننىڭ 5-ءسى كۇنى انام اۋىرىپ, جەدەل جاردەم شاقىرتتىق. تەمپەراتۋراسى 38 گرادۋسقا كوتەرىلدى. شاقىرعان جاردەمىمىز ەكى ساعاتتان سوڭ ازەر كەلدى. بىراق اۋرۋحاناعا الماي كەتتى. ەرتەسى سۇيرەتىلىپ, ەمحاناعا ءوزىمىز بارىپ, رەنتگەنگە تۇسىردىك. سونىڭ ناتيجەسىمەن اۋرۋحاناعا بارىپ ەدىك, وكپەنىڭ 25 پايىزى عانا زاقىمدانعاندىقتان جاتقىزبايتىندارىن جەتكىزدى. ناۋقاستىڭ جاعدايىنا ەمەس, پايىزعا قارايتىنى تۇسىنىكسىز. قىسقاسى, سالعىرتتىق كوپ, – دەيدى وسكەمەن قالاسىنىڭ تۇرعىنى نازەركە سالىمبەكقىزى.
وسى تەكتەس نارازىلىقتارعا بايلانىستى وبلىستىق دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ ارنايى ءباسپاسوز كونفەرەنتسياسىن وتكىزىپ, ءمان-جايدى ءتۇسىندىردى. ايتۋىنشا, بۇگىنگى تاڭدا شىعىس قازاقستاندا 3 709 ينفەكتسيالىق توسەكتىك ورىن بولسا, اۋرۋحانالاردا ۇزىن سانى 720 ادام ەمدەلىپ جاتىر ەكەن. پايىزعا شاقساق, توسەك قورىنىڭ 19 پايىزىندا عانا ناۋقاستار جاتىر. وسكەمەندە ستاتسيونارلارعا 1 240 ادامدى ورنالاستىرۋ مۇمكىندىگى بار. ال قازىرگى ۋاقىتتا 464 ناۋقاس قانا اۋرۋحاناعا جاتقىزىلدى. وبلىس ورتالىعىنىڭ توسەك قورىنىڭ جۇكتەمەسى 37,4 پايىزدى قۇرايدى.
– الەۋمەتتىك جەلىلەردە تاراعان بەينە روليكتىڭ بىرىندە وسكەمەن قالاسىنىڭ اۋرۋحاناسىنا زايساننان كەلگەن ناۋقاس تۋرالى ايتىلعان. بەينەماتەريالدا دارىگەرلەردىڭ ونى اۋرۋحاناعا جاتقىزۋدان باس تارتقانى كورسەتىلگەن. سەبەبى كلينيكالىق حاتتامالارعا سايكەس ناۋقاستى اۋرۋحاناعا جاتقىزۋ كورسەتكىشتەرى بولماعان. الەۋمەتتىك جەلىدە تاراعان بەينەماتەريالدا ماسەلە تولىق كورسەتىلمەگەن. ستاتسيونارلارىمىزدا كوروناۆيرۋستى ەمدەۋگە ارنالعان ءدارى-دارمەكتەردىڭ ەكى ايلىق قورى بار, – دەيدى وبلىستىڭ باس دارىگەرى ەرمەك وماربەكوۆ.
سونىمەن قاتار دياگنوستيكا جاساۋ جانە ەمدەۋ حاتتاماسىندا بەلگىلى ءبىر ەرەكشەلىكتەر بار. سوعان سايكەس, كەيبىر پاتسيەنتتەردى ءۇي جاعدايىندا, ەندى ءبىرىن ناۋقاستاردى ستاتسيونار جاعدايىندا ەمدەۋ قاجەت ەكەن. دارىگەرلەردىڭ ايتۋىنشا, دەنە قىزۋى نەمەسە باسقا دا بەلگىلەر پايدا بولسا, بىردەن اۋرۋحاناعا بارۋدىڭ قاجەتى جوق. تۇرعىلىقتى جەرى بويىنشا ەمحاناعا قوڭىراۋ شالىپ, ۋچاسكەلىك دارىگەردى شاقىرعان ءجون. جاعدايى ناشارلاعان جاعدايدا, اۋرۋحاناعا جاتقىزىلادى. ال دارىگەرلەر تاراپىنان قانداي دا قۇقىق بۇزۋشىلىق ورىن السا, ماسەلەنى زاڭدى جولمەن شەشۋگە بولادى.
–ەگەر پاتسيەنتتە مەديتسينالىق مەكەمەگە قانداي دا ءبىر شاعىم بولسا, ونىڭ قۇقىقتارى بۇزىلعانىن, اۋرۋحانالاردا كورسەتىلگەن سەنىم تەلەفوندارى بويىنشا, حابارلاپ ايتۋعا بولادى. بۇدان باسقا, وبلىستىق دەنساۋلىق ساقتاۋ باسقارماسىنىڭ 8(7232) 701-131 بىرىڭعاي انىقتاما تەلەفونى جۇمىس ىستەيدى. سونداي-اق شاعىمدارمەن الەۋمەتتىك مەديتسينالىق ساقتاندىرۋ قورىنا جۇگىنۋگە بولادى, – دەدى وسكەمەن قالاسىنىڭ №4 قالالىق اۋرۋحاناسىنىڭ باس دارىگەرى سەرگەي پوپوۆ.
ايتقانداي, سەنىم تەلەفونىن ءبىز پايدالانامىز با؟ قانداي دا ماسەلەنى الەۋمەتتىك جەلىگە جۇكتەگەننەن گورى زاڭدى جولمەن شەشىپ كوردىك پە؟ الداعى ۋاقىتتاردا وسىعان ۇقساس داۋ تۋىپ جاتسا, سەنىم تەلەفونىنىڭ پارمەنىن ءبىر تەكسەرىپ كورۋگە بولاتىن سەكىلدى.