«ەير استانا» اۋەكومپانياسى نۇر-سۇلتاننان سانكت-پەتەربۋرگكە تۇراقتى رەيستى جاڭارتادى, دەپ حابارلايدى Egemen.kz.
اۋەكومپانيانىڭ مالىمەتىنشە, نۇر-سۇلتان - سانكت-پەتەربۋرگ رەيسى 9 قازاننان باستاپ قالپىنا كەلتىرىلىپ, الدىمەن سەنبىدە, ال قاراشادان باستاپ سارسەنبىدە ورىندالادى.
13 قىركۇيەكتە رەسەي ۇكىمەتى ماسكەۋ - نۇر-سۇلتان باعىتى بويىنشا رەيستەردى ۇشتەن جەتىگە دەيىن جانە ماسكەۋ - الماتى باعىتىن اپتاسىنا ەكىدەن جەتى رەيسكە دەيىن ۇلعايتۋ, سونداي-اق ماسكەۋ - قاراعاندى, ماسكەۋ - شىمكەنت, ماسكەۋ - اقتاۋ, ماسكەۋ - قوستاناي, سانكت-پەتەربۋرگ - نۇر-سۇلتان, ماحاچكالا - اقتاۋ, گروزنىي - اقتاۋ, كالينينگراد - الماتى, كالينينگراد - نۇر-سۇلتان, نوۆوسيبيرسك - نۇر-سۇلتان, ومبى - نۇر-سۇلتان, ومبى - پاۆلودار, ومبى - پەتروپاۆل باعىتتارى بويىنشا اپتاسىنا ءبىر رەيستى جۇزەگە اسىرۋ جوسپارى تۋرالى حابارلاعان.
كەيىنىرەك قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى 21 قىركۇيەكتەن باستاپ نۇر-سۇلتان مەن ماسكەۋ اراسىنداعى رەيستەر جيىلىگىنىڭ ارتۋىنا بايلانىستى قازاقستان مەن رەسەي اراسىنداعى اۋە رەيستەرىنىڭ سانى اپتاسىنا 54-كە دەيىن كوبەيەتىنىن حابارلادى.