دۇنيەجۇزىلىك دەنساۋلىق ساقتاۋ ۇيىمى (ددسۇ) افريكا ەلدەرىندەگى ۇزاق جىلدار بويى جۇرگىزىلگەن سىناقتاردان كەيىن بەزگەككە قارسى الەمدەگى العاشقى ۆاكتسينانى قولدانۋدى ماقۇلدادى جانە ونى بۇكىل الەمدە قولدانا باستاۋدى ۇسىندى, دەپ حابارلايدى Egemen.kz.
بۇل تۋرالى Deutsche Welle باسىلىمى ءمالىم ەتتى.
ددسۇ باس ديرەكتورى تەدروس ادانوم گەبرەيەسۋس بۇۇ دەنساۋلىق ساقتاۋ اگەنتتىگىنىڭ ەكى ساراپتامالىق كونسۋلتاتيۆتىك توبىنىڭ ماقۇلداۋىن «تاريحي ءسات» دەپ اتادى. RTS, S جانە «موسكيريكس» دەگەن اتپەن بەلگىلى بەزگەككە قارسى ۆاكتسينانى العاش رەت 1987 جىلى بريتاندىق GlaxoSmithKline (GSK) فارماتسەۆتيكالىق كومپانياسى جاساعان.
«بۇل – افريكادا افريكالىق عالىمدار جاساعان ۆاكتسينا جانە ءبىز ونى ماقتان تۇتامىز. بۇل ۆاكتسينانى بەزگەكتىڭ الدىن الۋ قۇرالى رەتىندە قوسىمشا پايدالانۋ جىل سايىن ونداعان مىڭ جاس ادامنىڭ ءومىرىن ساقتاپ قالۋى مۇمكىن», دەدى ددسۇ باس ديرەكتورى.
2019 جىلدان باستاپ ددسۇ گانا, كەنيا جانە مالاۆيدەگى 800 مىڭنان استام بالاعا وسى ۆاكتسينانىڭ تيىمدىلىگىن زەرتتەدى.
بەزگەك – بۇل بەزگەك ماسالارىنىڭ شاعۋى ارقىلى ادامعا بەرىلەتىن جۇقپالى اۋرۋ. اۋرۋ قىزبا, قالتىراۋ, كوكباۋىر مەن باۋىر كولەمىنىڭ ۇلعايۋىمەن, سونداي-اق انەميامەن بىرگە جۇرەدى.
جىل سايىن ونى شامامەن 350-500 ميلليون ادام جۇقتىرادى. ونىڭ ىشىندە 1,3-3 ميلليونعا جۋىق ادام كوز جۇمادى. نەگىزىنەن بۇل اۋرۋ ساحارانىڭ وڭتۇستىگىندەگى افريكا ەلدەرىندە تارالعان.