بالا تۋعاندا بەرىلەتىن جاردەماقى مەن ءبىر جاسقا دەيىنگى بالا كۇتىمى بويىنشا تولەمدى ەكىنشى دەڭگەيدەگى بانكتەر ارقىلى رەسىمدەۋگە بولادى.
ەڭبەك جانە حالىقتى الەۋمەتتىك قورعاۋ مينيسترلىگى ادىلەت, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن بىرلەسىپ, ەكىنشى دەڭگەيدەگى بانكتەردىڭ ءموبيلدى قوسىمشالارى ارقىلى «بالا تۋعاندا بەرىلەتىن جانە بالا كۇتىمى بويىنشا جاردەماقىلاردى تاعايىنداۋ» جانە «بالا ءبىر جاسقا تولعانعا دەيىن ونىڭ كۇتىمىنە بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەمدەردى تاعايىنداۋ» مەملەكەتتىك قىزمەتتەرىن كورسەتۋ جونىندەگى قاناتقاقتى جوبانى ىسكە اسىرۋدى باستادى. جاڭا سەرۆيس ازاماتتار ءۇشىن بيىل 5 قازاننان باستاپ قولجەتىمدى بولادى.
ەكىنشى دەڭگەيدەگى بانكتەردىڭ ءموبيلدى قوسىمشالارى ارقىلى مەملەكەتتىك قىزمەتتەردى الۋ ىڭعايلىلىعى – بۇل جەكە ەتسق-كىلتتەردى پايدالانۋ جانە قوسىمشا اقپاراتتى ەنگىزۋ قاجەتتىلىگىنىڭ بولماۋى.
قاناتقاقتى جوباعا كاسپي بانكى مەن حالىق بانكى قاتىسۋدا. جاردەماقى نەمەسە الەۋمەتتىك تولەم تاعايىنداۋدى رەسىمدەۋ ءۇشىن وسى بانكتەردىڭ ءبىرىنىڭ ءموبيلدى قوسىمشاسىندا مەملەكەتتىك قىزمەت كورسەتۋ بويىنشا ءبولىمدى تابۋ, ءتيىستى مەملەكەتتىك قىزمەتتى تاڭداۋ جانە دەربەس دەرەكتەردى وڭدەۋگە كەلىسىمدى راستاۋ قاجەت. ءوتىنىمدى جىبەرگەننەن جانە ونى مەملەكەتتىك ورگان تاراپىنان قاراعاننان كەيىن كورسەتىلەتىن قىزمەتتى الۋشىعا ونى قاراۋ ناتيجەسى جانە تاعايىندالعان تولەم سوماسى تۋرالى PUSH-حابارلاما جانە SMS جىبەرىلەدى.
«بۇل جوبا كەلەسى توعىز ايدا جۇزەگە اسىرىلادى. وڭ ديناميكا مەن سۇرانىس بولعان, سونداي-اق ەكىنشى دەڭگەيدەگى بانكتەر تەحنيكالىق جاعىنان دايىن بولعان جاعدايدا جوبا پيلوتتىق فورماتتان قولدانىستاعى فورماتقا كوشىرىلەدى دەپ جوسپارلانۋدا. ءوز كەزەگىندە, مەملەكەتتىك ورگاندار باسقا ەكىنشى دەڭگەيدەگى بانكتەرمەن ىنتىماقتاسۋ جانە ەدب ءموبيلدى قوسىمشالارى ارقىلى كورسەتىلەتىن قىزمەتتەردىڭ تىزبەسىن كەڭەيتۋ ءۇشىن اشىق», دەپ اتاپ ءوتتى ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك قىزمەتتەردى تالداۋ جانە دامىتۋ دەپارتامەنتىنىڭ ديرەكتورى انار تولەۋباەۆا.
ازاماتتاردىڭ كەڭ اۋقىمىنا قولجەتىمدى مەملەكەتتىك ورگانداردىڭ دەرەكقورلارىن جانە وزگە دە پلاتفورمالاردى ينتەگراتسيالاۋ بويىنشا وسىنداي جوبالاردى ىسكە اسىرۋ حالىقتى ەلەكتروندى مەملەكەتتىك قىزمەتتەرمەن قامتۋدى ۇلعايتۋعا مۇمكىندىك بەرەدى, ونىڭ قولجەتىمدىلىگىن, ىڭعايلىلىعىن ارتتىرادى جانە كورسەتۋ ۋاقىتىن قىسقارتادى.