شىعىس قازاقستان وبلىسى گلۋبوكوە اۋدانىندا قازاقستان رەسپۋبليكاسىنىڭ ازاماتى رەتىندە 3 جىل زەينەتاقى العان رەسەي ازاماتى انىقتالدى, دەپ حابارلايدى Egemen.kz شقو پوليتسيا دەپارتامەنتىنىڭ كوشى-قون قىزمەتىنە سىلتەمە جاساپ.
وبلىس اۋماعىندا قوس ازاماتتىعى بار ادامداردى انىقتاۋ بويىنشا جۇمىس كۇندەلىكتى جۇرگىزىلۋدە. وزگە ەلدىڭ ازاماتتىعىنا وتكەننەن كەيىن قازاقستاندىق ازاماتتىقتان باس تارتۋى قاجەت. ول ءۇشىن 30 كۇندىك مەرزىمدە ىشكى ىستەر ورگاندارىنا باسقا مەملەكەتتىڭ ازاماتتىعىن العانى تۋرالى حابارلاۋ, سونداي-اق قر تولقۇجاتى مەن جەكە كۋالىگىن تاپسىرۋ قاجەت.
«وكىنىشكە قاراي, شقو-نىڭ كەيبىر تۇرعىندارى بۇل شارانى ەلەمەيدى, سوندىقتان قوس ازاماتتىق فاكتىلەرىنىڭ ءوسۋى بايقالادى. ماسەلەن, 1 قازاندا ءتارتىپ ساقشىلارى 2016 جىلى قىرعىز رەسپۋبليكاسىنىڭ ازاماتتىعىن قابىلداعان, ال قازاقستان اۋماعىندا تۇرىپ, قر ازاماتىنىڭ جەكە باسىن كۋالاندىراتىن قۇجاتتاردى پايدالانعان قىرعىزستاندىق 28 جاستاعى ازاماتتى «سەمەي-وسكەمەن» اۋە رەيسىنەن الىپ تاستادى», دەلىنگەن ۆەدومستۆو حابارلاماسىندا.
«قوس ازاماتتىقتىڭ تاعى ءبىر جاعدايىن گلۋبوكوە اۋدانىنىڭ كوشى-قون قىزمەتىنىڭ قىزمەتكەرلەرى انىقتادى. 4 قازاندا زەينەتاقى تولەۋ جونىندەگى مەملەكەتتىك ورتالىقپەن سالىستىرۋ كەزىندە 19 جىل بۇرىن رەسەي فەدەراتسياسىنىڭ ازاماتتىعىن العان اۋدان ورتالىعىنىڭ 66 جاستاعى تۇرعىنى انىقتالدى. ەر ادام 16 جىل بويى رەسەيدەن زەينەتاقى الىپ كەلگەن, 2018 جىلى زەينەتكەرلىك جاسقا تولعاننان كەيىن قر اۋماعىندا زەينەتاقى رەسىمدەگەن. قازىرگى ۋاقىتتا زاڭسىز الىنعان اقشا قاراجاتىن قايتارۋ ماسەلەسى قاراستىرىلۋدا», دەلىنگەن شقو پوليتسيا دەپارتامەنتى حابارلاماسىندا.
مۇنداي زاڭسىزدىقتى جاساعانى ءۇشىن وعان 100 اەك كولەمىندە ايىپپۇل سالىنادى.
«قازاقستان ازاماتتىعى قۇجاتتارىن پايدالانعانى ءۇشىن قر اقبتك-ءنىڭ 496-بابى بويىنشا 100 اەك كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى. قازىر قۇجاتتارى الىنىپ, ازاماتتىعىنان ايىرىلعانى تىركەلدى», دەدى شقو پد كوشى-قون قىزمەتى باسقارماسىنىڭ باستىعى ەربول بەكپاەۆ.
ايتا كەتەيىك, جىل باسىنان بەرى شقو اۋماعىندا ءتارتىپ ساقشىلارى 60-تان استام «قوس ازاماتتىعى» بارلاردى انىقتادى, وسىعان بايلانىستى كوشى-قون قىزمەتى قازاقستان رەسپۋبليكاسىنىڭ كونستيتۋتسياسىنا سايكەس ەلدە قوس ازاماتتىققا جول بەرىلمەيدى جانە كوشى-قون زاڭناماسىن ساقتاۋدى سۇرايدى. ءتارتىپ بۇزعان جاعدايدا ازاماتتار اكىمشىلىك كودەكستىڭ 496-بابى بويىنشا جاۋاپكەرشىلىككە تارتىلادى.