كەشە تەاتر شىمىلدىعى ءتۇرىلىپ, وسكەمەندىكتەر رۋحاني دەمالىپ قايتتى. قازاق دراما تەاترى كەزەكتى 22-ءشى ماۋسىمىن عابيت مۇسىرەپوۆتىڭ «قوزى كورپەش-بايان سۇلۋ» تراگەدياسىمەن اشتى.
الەمگە جايىلعان ىندەتتىڭ كەسىرىنەن ەڭسەسى باسىلىپ قالعان ەل سپەكتاكلدەن سەرگىپ شىقتى. كىرشىكسىز ماحاببات سەزىمى مەن ادالدىق قاسيەتتەردى ارقاۋ ەتكەن قويىلىمنان كەيىن كورەرمەننىڭ ءبىر سەرپىلىپ قالعانىن بايقادىق. تەاتر فويەسىندە قاۋقىلداسىپ, قويىلىمدى تالقىلاسىپ ۇزاق تۇردى ەل.
– رۋحاني جيىندارعا شولدەپ قالىپپىز. تراگەديالىق قويىلىمنىڭ وزىنەن كەرەمەتتەي اسەر الىپ شىقتىق. ء«ومىر – تەاتر» دەگەندەي, ومىردەگى كەيىپكەرلەردى ساحنادان كورىپ وتىردىم. مىنە, تەاتردىڭ 22 ماۋسىمى اشىلدى. ەندىگى كەزەكتە, ەل اماندىقتا, ەش كەدەرگىسىز قويىلىمدار جالعاسا بەرسە ەكەن, – دەيدى كورەرمەن ايدانا بولاتقىزى.
بۇل جولى تەاتر ماۋسىمى ەرەكشە باستالدى. فويەگە كيىز ءۇيدىڭ ىشكى جابدىقتارىنان ۇيلەستىرىپ, فوتو-زونا جاساعان. وندا كورەرمەندەر شاپان, كامزول كيىپ, سۋرەتكە ءتۇسىستى. ال سپەكتاكل باستالماس بۇرىن اق كيمەشەكتى اجە «الاس-الاس» دەپ, قازاقى داستۇرمەن ساحنانى الاستاپ شىقتى. بۇل-داعى بالە-جالا جولاماسىن دەگەن نيەت قوي. سونداي-اق جۇمىستا جەتىستىكتەرگە جەتىپ, بەلسەندىلىك تانىتقان قىزمەتكەرلەر ماراپاتتالدى.
سونىمەن قوش. جارىق ءبىر ءسونىپ, قايتا جانعاندا قارابايدىڭ اۋىلىنان بىراق شىققانداي بولدى كورەرمەن. ازان-قازان اۋىل. ورتادا قۇراۋ-قۇراۋ دەپ, جىلقىسىن تۇگەندەگەن قاراباي ءجۇر. كورەرمەن وقيعا جەلىسىن ءبىلىپ وتىرعانىمەن, ارتىستەردىڭ تالانتىنا تاڭداي قاقتى. قوزىعا قوقاڭداعان قوداردىڭ رولىندەگى ارىستانبەك مۇقيات, ەكى ءجۇزدى جانتىقتىڭ وبرازىن ويداعىداي الىپ شىققان ەرنات مۇحامەتحانوۆ, بايان سۇلۋدى سومداعان اراي مارالبەكوۆالار ناعىز تالانتتى ارتىستەر دەر ەدىك.
سپەكتاكلدە قوس عاشىقتىڭ ءبىر-بىرىنە دەگەن ادالدىعى, ماحابباتتى كورىنىس تاپتى. سونىمەن قاتار دۇنيەقوڭىزدىقتىڭ, قىزعانىشتىڭ سوڭى سان قاقتىراتىنى جينالعان قاۋىمعا وي سالعان شىعار. جالپى, قازاق حالقىنىڭ ادەت-عۇرىپتارىن تۇرمىس-سالت جىرلارىمەن بايلانىستىرا وتىرىپ, سول كەزدەگى قوعام تىنىسىنان سىر شەرتكەن قويىلىم بولدى.