مەملەكەتتىڭ قولداۋى مەرەيىمدى ءوسىردى

بۇگىندە 28 جىلدان اساتىن ەڭبەك ءوتىلىم بار. نۇر-سۇلتان قالالىق №1 بالالار مۋزىكا مەكتەبىندە حورەوگراف بولىپ جۇمىس ىستەيمىن. حورەو­گرافيا ءبولىمىنىڭ مەڭگەرۋشىسى­مىن. بولىمدە 130-عا جۋىق شاكىرت تاربيەلەنەدى. وزىممەن قاتار ءتورت مۇعالىم ءتالىم بەرەدى. مەن 4-7-سىنىپ وقۋشىلارىنا «حالىقتىق ساحنالىق بي» ساباعىن وتكىزەمىن. ءىزىمدى باسىپ, ۇستاز-حورەوگراف بولىپ جۇرگەن شاكىرتتەرىم دە بار. سونداي-اق ءبىزدىڭ بولىمنەن تۇلەپ ۇشقان ەليزاۆەتا پالينكا حورەوگرافيا اكادەمياسىنا, ال داريا تارىبو قاراعاندىداعى تاتتىمبەت اتىنداعى ونەر كوللەدجىنىڭ حورەوگرافيا بولىمىنە وقۋعا قابىلداندى. ءبىز ءۇشىن ەتكەن ەڭبەكتىڭ جەمىسى – وسى.

بايقاۋ بارىسىندا الدىمەن ءوزىمنىڭ جانە شاكىرتتەرىمنىڭ جەتكەن جەتىستىكتەرىن جىپكە ءتىزىپ, پورتفوليو ازىرلەدىم. «مەنىڭ مەكتەبىم – جۇرەگىم» تاقىرىبىندا بەينەروليك ءتۇسىردىم. ساباق وتكىزدىم. سول قۇجاتتارمەن قالالىق كەزەڭ­گە قاتىسىپ, ەكىنشى ورىن يەلەن­دىم. وسىلايشا كونكۋرستىڭ رەسپۋبلي­كالىق كەزەڭىنە جولداما العان بولاتىنمىن. بىلۋىمىزشە, بايقاۋ وتە تارتىستى وتكەن ەكەن. شەشىم شىعارۋ دا وڭاي بولماعانى انىق. بايقاۋدا باس-اياعى 64 ۇستاز جۇلدەلى بولدى. ولاردىڭ اراسىندا مەن دە بارمىن.

بيىل ۇلت ۇستازى, اعارتۋشى ىبىراي التىنساريننىڭ تۋعانىنا 180 جىل, ەلىمىز تاۋەلسىزدىك العانىنا 30 جىل تولىپ وتىر. سونىمەن قاتار وسى كونۋرستىڭ ۇيىمداستىرىلىپ كەلە جاتقانىنا 10 جىلدىڭ ءجۇزى بولدى. مەرەيلى داتالارعا تولى جىل دەسە دە بولادى. سوندىقتان ۇيىم­داستىرۋشىلاردىڭ ۇيعا­رىمىمەن بايقاۋ بيىل ى.ءال­تىن­­ساريننىڭ كىندىك قانى تامعان ءوڭىر سانالاتىن قوستاناي قالاسىندا ءوتتى.

وسىدان ەكى جىل بۇرىن «پەداگوگ مارتەبەسى تۋرالى» زاڭ قابىلدانىپ, ەلىمىزدەگى ۇستازداردىڭ مارتەبەسى ايقىندالعان بولاتىن. سودان بەرى مۇعالىمدەردىڭ جاعدايى جاقسارا باستادى. ارينە, ءار پەداگوگ بەلگىلى ءبىر جەتىستىككە جەتۋ ءۇشىن بارىن سالىپ, تالپىنىپ, تىرىسىپ جاتادى عوي. اۆتورلىق, يننوۆاتسيالىق جۇمىستاردى قولعا الىپ, ءبىلىم سالاسىنا تامشىداي بولسىن ۇلەسىن قوسۋعا ۇمتىلادى. سول ۇمتىلىس لايىقتى باعالانا باستادى. ءوزىم – پەداگوگ-زەرتتەۋشىمىن. بۇل مارتە­بەم ءۇشىن جالاقىما 40 پايىز ەڭبەك­اقى قوسىلادى. پەداگوگ-شەبەرگە قوسىلاتىن ۇستەمەاقى مولشەرى 50 پايىزدى قۇرايدى. مەملەكەت تاراپىنان جاسالىپ جاتقان مۇنداي قولداۋ – ۇستازداردى جۇمىس دەڭگەيىن ارتتىرۋعا ىنتالاندىرادى.

سوندىقتان «پەداگوگ مارتەبەسى تۋرالى» زاڭعا قول قويىپ, ۇلت ۇستازدارىنا قوماقتى قولداۋ كورسەت­كەن مەملەكەت باسشىسى قاسىم-جومارت توقاەۆقا جانە مۇعالىم­دەردىڭ جاعدايىن جاقسارتۋ ماسە­لە­سىندە پرەزيدەنتتىڭ تاپسىرماسىن مۇلتىكسىز ورىنداپ كەلە جاتقان ءبىلىم جانە عىلىم ءمينيسترى اسحات ايماعامبەتوۆكە العىسىمىز شەك­سىز. ۆەدومستۆو باسشىسى ءبىلىم سالاسىن­داعى بارلىق قىزمەتتى جەتە قا­داعالاپ كەلەدى. سونىڭ ناتيجەسىندە ۇستازدار قاۋىمى دا جەمىستى جۇمىس ىستەپ, الاڭسىز قىزمەت ەتۋ ۇستىندە.

باگدينا سەكەربەك,

«ۇزدىك پەداگوگ-2021» كونكۋرسىنىڭ جۇلدەگەرى