شىمكەنت قالاسىنىڭ اكىمى مۇرات ايتەنوۆ قالاداعى زەينەتكەرلەردى ساۋىقتىرۋعا ارنالعان «اسىل جۇرەك» ورتالىعىنىڭ جۇمىسىمەن تانىستى, دەپ جازادى Egemen.kz.
اكىم قىزمەت الۋشىلارمەن تىلدەسىپ, قارتتار كۇنى مەرەكەسىمەن قۇتتىقتادى.
مەملەكەت تاراپىنان ارداگەرلەرگە ارقاشان قامقورلىق كورسەتىلەتىنىن جانە ونىڭ كولەمى جىل سايىن ارتىپ وتىرعانىن ايتقان قالا باسشىسى بۇل باعىتتاعى جۇمىستار پرەزيدەنتتىڭ مەملەكەتتىك ساياساتىنداعى باسىم باعىتتاردىڭ ءبىرى ەكەنىن اتاپ ءوتتى.
شىمكەنتتەگى الەۋمەتتىك-مەديتسينالىق «اسىل جۇرەك» ورتالىعى 2019 جىلدىڭ ناۋرىز ايىندا اشىلعان. مۇندا كۇنىنە 4 ساعات اقىسىز جارتىلاي ستاتسيونارلىق جاعدايىندا مەديتسينالىق جانە ارناۋلى الەۋمەتتىك قىزمەت كورسەتىلەدى. ورتالىق ەكى اۋىسىمدا جۇمىس ىستەيدى. ءبىر اۋىسىمدا 80 ادامعا دەيىن قىزمەت كورسەتەدى.
بۇل جەردە كۇن ءتارتىبى زەينەتكەرلەردى دارىگەرلىك تەكسەرۋدەن باستالادى. قارتتارعا قىزمەت كورسەتۋ ءۇشىن جوعارى ساناتتى كارديولوگ, تەراپەۆت, نەۆروپاتولوگ جانە فيزيوتەراپەۆت دارىگەرلەرى جۇمىلدىرىلعان. جۋىردا مەكەمەدە فيزيوتەراپيا كابينەتى اشىلىپ, كوپفۋنكتسيونالدى «پوليماگ» قوندىرعىسى ىسكە قوسىلدى.
ورتالىقتا جىل باسىنان بەرى 235 زەينەتكەر ەكى اي كولەمىندە ارناۋلى الەۋمەتتىك قىزمەت الدى. الداعى ۋاقىتتا ورتالىقتىڭ قالا اۋداندارىندا بولىمشەلەرىن اشۋ جوسپارلانعان.
«ايتا كەتەيىك, بۇگىندە شىمكەنت قالاسى بويىنشا زەينەتكەرلەر سانى – 82 351, سونىڭ ىشىندە ۇوس ارداگەرلەر سانى – 12, تىل ەڭبەككەرلەرى – 2848», دەپ حابارلادى شىمكەنت قالاسى اكىمدىگىنىڭ ءباسپاسوز قىزمەتى.