قر پرەمەر-ءمينيسترىنىڭ ورىنباسارى رومان سكليار ەل ۇكىمەتى جۇزەگە اسىرىپ جاتقان پرەزيدەنت جولداۋىن ىسكە اسىرۋ شارالارى تۋرالى باياندادى, دەپ جازادى Egemen.kz.
قازاقستان ۇكىمەتى وڭىرلىك ساياسات پەن اۋماقتىق دامىتۋدى جەتىلدىرۋدى جوسپارلاپ وتىر.
«ەلدىڭ دامۋى وڭىرلەردىڭ تەڭگەرىمدى دامۋى نەگىزىندە عانا مۇمكىن بولادى. جىل سوڭىنا دەيىن قازاقستان رەسپۋبليكاسىنىڭ 2025 جىلعا دەيىنگى اۋماقتىق دامۋ جوسپارى قابىلدانادى, ول وڭىرلىك ستاندارتتار جۇيەسى نەگىزىندە «ينفراقۇرىلىم ادامدارعا» قاعيداتىن ىسكە اسىرۋعا باعىتتالعان», دەدى ر.سكليار.
رومان سكليار بۇل قاعيداتتىڭ ينفراقۇرىلىمدى, ونىڭ ىشىندە كولىك, الەۋمەتتىك, كوممۋنيكاتسيالىق جانە ەنەرگەتيكالىق ينفراقۇرىلىمدى دامىتۋدا ماڭىزدى ەكەنىن ءتۇسىندىردى.
ۇكىمەت قالالار مەن اۋىلدىق ەلدى مەكەندەردى دامىتۋدا كاسىپكەرلىكتى قولداۋ, «زاكىرلىك جوبالاردى» ىسكە اسىرۋ ارقىلى ەكونوميكانى ءارتاراپتاندىرۋ, ينجەنەرلىك ينفراقۇرىلىمدى سالۋ جانە جاڭعىرتۋ, كولىكتىك بايلانىس ماسەلەلەرىن شەشۋ, الەۋمەتتىك-ەكونوميكالىق دامۋدىڭ كەشەندى جوسپارلارىن ىسكە اسىرۋ جانە ت.ب. ماسەلەلەرگە نازار اۋدارادى.
2020 جىلدىڭ قورىتىندىسى بويىنشا رەسپۋبليكا حالقىنىڭ 94%-ى سۋمەن قامتاماسىز ەتىلگەن. بۇل 17,7 ملن ادام. مەملەكەت باسشىسى العا قويعان مىندەتتەردى ورىنداۋ ءۇشىن 1,3 ملن-عا جۋىق ەل ازاماتى تۇراتىن 1 922 اۋىلدا سۋمەن جابدىقتاۋ جەلىلەرى مەن سۋ تازارتۋ جۇيەلەرىنىڭ قۇرىلىسى جالعاسادى. وسىلايشا, 2025 جىلعا قاراي ەل حالقى 100% تازا اۋىز سۋمەن قامتاماسىز ەتىلەدى.