جاھاندى جايلاعان كوروناۆيرۋس ىندەتىمەن كۇرەس ءوز ناتيجەسىن بەرىپ, بۇگىندە جامبىل وبلىسى «قىزىل» ايماقتان شىقتى. سونداي-اق تۇرعىنداردىڭ قاۋىپتى ىندەتتەن قورعانۋى ءۇشىن ۆاكتسينا سالۋ كورسەتكىشى دە جوعارى.
ماسەلەن, وڭىردە 18 جاستان اسقان 582 مىڭ تۇرعىندى كوروناۆيرۋس ينفەكتسياسىنا قارسى ەكپەمەن قامتۋ جوسپارلانسا, قازىرگى تاڭدا ايماقتاعى 460 652 ازامات, ياعني 80 پايىزعا جۋىق تۇرعىن ۆاكتسينا قابىلداعان. سونىمەن قاتار قاۋىپتى ىندەتپەن كۇرەستى جالعاستىرۋ ماقساتىندا وبلىستا ءالى دە ۆاكتسينا سالۋ جۇمىستارى جۇرگىزىلۋدە.
وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, وڭىردەگى 23 مەديتسينالىق ۇيىمدا 43 ەگۋ پۋنكتى بار. ونىڭ ىشىندە 15 پۋنكت تاراز قالاسىندا بولسا, قالعان 28 پۋنكت اۋدانداردا ورنالاسقان. ال قىركۇيەك ايىندا قاۋىپتى ىندەتتىڭ 19 533 جاعدايى تىركەلسە, پنەۆمونيامەن 7 299 ادام اۋىرعان. سونىمەن قاتار كوروناۆيرۋس ىندەتىن ءبىر تاۋلىكتە 53 ازامات جۇقتىرعان بولسا, ال پنەۆمونياعا 14 تۇرعىن شالدىققان.
«قازىرگى جاعدايعا سايكەس, ينفەكتسيالىق ستاتسيونارلاردا 630, رەانيماتسيالىق توسەكتىك ورىنداردا 81 ناۋقاس جاتىر. كارانتيندىك ستاتسيونارعا 9 ادام ورنالاستىرىلعان. ولاردىڭ دەنساۋلىق جاعدايلارى تۇراقتى باقىلاۋدا», دەدى ءا.قاليەۆ.
بيىل 1 اقپاننان باستاپ وبلىسقا 57 070 دوزا QazCovid-in وتاندىق ۆاكتسيناسى, 341 700 دوزا سپۋتنيك V ەكپەسىنىڭ ءبىرىنشى كومپونەنتى جانە 316 070 دوزا ەكىنشى كومپونەنتى, سونداي-اق, 60 مىڭ دوزا Hayat Vax كەلگەن. سونىمەن قاتار, 34 مىڭ دوزا كوروناۆاك, 124 مىڭ دوزا Vero سell سينوفارم ۆاكتسينالارى دا جەتكىزىلىپتى. بۇگىندە وتاندىق ەكپەنىڭ 1 063, سپۋتنيك V ەكپەسىنىڭ ءبىرىنشى كومپونەنتىنىڭ 335, ال, ەكىنشى كومپونەنتىنىڭ 42 225 دوزاسى قالعان. ال, سينوفارم ەكپەسىنەن 17 096 دوزا بار ەكەن.
«جامبىل وبلىسى نەگىزىنەن كليماتتىق-گەوگرافيالىق ورنالاسۋ ەرەكشەلىكتەرىنە بايلانىستى ينفەكتسيالىق اۋرۋلاردىڭ, ونىڭ ىشىندە اسا قاۋىپتى اۋرۋلاردىڭ بىرنەشە تۇرلەرىنىڭ پايدا بولۋ جانە تارالۋ قاۋپى جوعارى وڭىرگە جاتادى. جۇقپالى اۋرۋلار ادامزاتتىڭ وعان قارسى كۇرەستەگى ايقىن جەتىستىكتەرىنە قاراماستان, قازىرگى قوعام ءۇشىن ەڭ ۇلكەن قاۋىپتەردىڭ ءبىرى بولىپ تۇر. بىلتىر بارلىق ەلدى قامتىعان كوروناۆيرۋس ىندەتى اۋرۋى مەن ءولىم-ءجىتىمنىڭ تارالۋ جىلدامدىعى وعان ايقىن دالەل. قاۋىپتى ىندەت الەمگە تەز تارالىپ, ەكونوميكاعا زيان كەلتىردى, كۇندەلىكتى ءومىر ىرعاعىن بۇزىپ, دۇربەلەڭ تۋدىردى. دەنساۋلىق ساقتاۋ سالاسىنىڭ ماسەلەلەرىن اشتى», دەدى باسقارما باسشىسى.
جامبىل وبلىسى