سولتۇستىك كورەيا وتكەن اپتادا جاڭادان جاسالعان دىبىستان جىلدام ۇشاتىن زىمىراندى سىناقتان وتكىزدى. بۇل تۋرالى جەرگىلىكتى KCNA مەملەكەتتىك تەلەارناسى حابارلادى. وسىلايشا, كحدر ءىرى اسكەري دەرجاۆالارمەن بىرگە قارۋ-جاراق جۇيەسىن جەتىلدىرۋ جارىسىنا قوسىلدى.
سولتۇستىك كورەيا سىناقتى شىعىس جاعالاۋى ماڭىندا جاساعان. زىمىران تەڭىزگە قاراي اتىلعان كورىنەدى. كحدر يادرولىق جانە بالليستيكالىق زىمىران ارسەنالىن كەڭەيتۋگە ارنالعان باعدارلاماسىن كۇشەيتىپ وتىر. ءسويتىپ, قارۋ-جاراق جۇيەسىن جەتىلدىرمەك. ال وعان اقش سانكتسيا سالعان بولاتىن.
اقش-تىڭ سولتۇستىك كورەيا جونىندەگى ارنايى وكىلى سۋن كيمنىڭ ايتۋىنشا, دىبىستان جىلدام زىمىراندى سىناقتان وتكىزۋ ايماقتى تۇراقسىزدىققا اكەلىپ, وڭىرگە قاۋىپ توندىرەدى. سوعان قاراماستان, ۆاشينگتون بيلىگى كورەيا تۇبەگىن يادرولىق قارۋدان ازات ەتۋ جونىندەگى ديپلوماتيالىق ارەكەتىن جالعاستىرا بەرمەك.
«پحەنياننان جاۋاپ كۇتەمىز. ويتكەنى, قارۋسىزدانۋعا قاتىستى كوپتەگەن ارەكەت جاسادىق. كوپتەگەن ماسەلە بويىنشا كەلىسسوز جۇرگىزۋدى ۇسىندىق», دەدى ول.
دىبىستان جىلدام ۇشاتىن زىمىرانداردىڭ نىساناعا باعىتتالعان تراەكتورياسىنا تۇسپەس بۇرىن عارىشقا قاراي ۇشاتىن بالليستيكالىق زىمىرانداردان ايىرماشىلىعى بار. مۇنداي گيپەرسونيك راكەتا جەرگە جاقىن, تومەن بيىكتىكتە ۇشادى. سونداي-اق جىلدامدىعى دىبىستان بەس ەسە كوپ. ياعني ساعاتىنا 6200 كم.
وڭتۇستىك كورەيا بىرلەسكەن اسكەري شتابىنىڭ حابارلاۋىنشا, سولتۇستىك كورەيانىڭ گيپەرسونيك زىمىرانى ءالى تولىققاندى جەتىلمەگەن. بۇل ونىڭ جىلدامدىعى مەن باسقا دا مالىمەتتەرىنە سۇيەنە وتىرىپ جاسالعان.