2022 جىلى بەيجىڭدە الاۋى تۇتاناتىن وليمپيا ويىندارىنا مانەرلەپ سىرعاناۋدان قاي مەملەكەتكە قانشا كۆوتا بەرىلگەنى بەلگىلى بولدى. وكىنشىكە قاراي, ولاردىڭ قاتارىندا قازاقستان جوق, دەپ جازادى Egemen.kz.
سوڭعى جىلدارى قازاق ەلى نامىسىن حالىقارالىق ارەنادا ابىرويلى قورعاپ جۇرگەن ەكى مانەرلەپ سىرعاناۋشى بار ەدى. ولار – دەنيس تەن مەن ەليزابەت تۇرسىنباەۆا. ءدال وسى ورەندەرىمىز وليمپياداعا تەك وزدەرى بارىپ قانا قويماي, قوسىمشا تاعى ءبىر جولدامانى يەلەنىپ, ونى وزدەرىنىڭ كوماندالىق ارىپتەستەرىنە سىيلايتىن. بىراق قازىر بىزدە ونداي مۇمكىندىك جوق. دەنيس الماتىنىڭ قاق ورتاسىندا, تاپاداي تال تۇستە جول تورىعان قاراقشىلاردىڭ قولىنان قازا تاپتى. جاراقاتىنان ايىعا الماعان ەليزابەت ۇلكەن سپورتپەن قوش ايتىستى. ناتيجەسىندە قازاقستان قۇراماسى وليمپيادا جولداماسىنان قاعىلدى.
سونىمەن, ەرلەر اراسىندا رەسەيدىڭ ءۇش, اقش پەن جاپونيانىڭ ەكى جانە كانادا, فرانتسيا, يتاليا, قىتاي, گرۋزيا, شۆەيتساريا, ەستونيا, بەلارۋس, لاتۆيا, چەحيا, مەكسيكا, ۋكراينا, شۆەتسيا جانە ءيزرايلدىڭ ءبىر سايىپقىرانى ونەر كورسەتەدى. ايەلدەر سايىسىندا رەسەيدىڭ ءۇش, اقش-تىڭ ەكى سپورتشىسى باق سىنايدى. سونداي-اق, جارىس جولىنا شىعاتىندار قاتارىندا بەلگيا, جپونيا, اۋستريا, ءوڭتۇستى كورەيا, ءازىربايجان, كانادا, ەستونيا, شۆەتسيا, نيدەرلاند, بولگاريا, گەرمانيا, گرۋزيا, قىتاي, چەحيا, ۇلىبريتانيا جانە فينليانديانىڭ ارۋلارى بار.