حالقىمىزدىڭ عاسىرلار بويى جالعاسىپ كەلە جاتقان قولونەرى قايتا جاندانىپ, كەمەل قالپىنا كەلە مە دەگەن ءۇمىت بار. قىزىعۋشىلار دا از ەمەس. ىنتاسى بارلاردى ءۇيىرىپ الىپ, ونەردىڭ قىر-سىرىن ۇيرەتۋگە دە داڭعىل جول اشىلىپ وتىر.
وبلىس ورتالىعىنداعى «بولاشاق» سارايىندا ساندىك-قولدانبالى قولونەر ۇيىرمەسى اشىلدى. جاس جەتكىنشەكتەر بەينەتى بەس باتپان بولعانىمەن, بەرەكەسى مول قولونەردى جاقسىلاپ مەڭگەرۋگە ۇمتىلۋدا. ءدىڭىن دەرت شالماعان, ساۋ اعاشتىڭ كەسىندىلەرىنەن كوڭىلى قالاعان بۇيىمدى بەينەلەپ ويىپ شىعارىپ ۇيرەنۋدە. كەيىن ونى جالىنمەن جالاتىپ, وتپەن كۇيدىرۋ ارقىلى كوركەمدەيدى. ۇزاق ۋاقىتتى, زور شىدامدىلىقتى قاجەت ەتەتىن وسى ونەردى ۇيرەنەمىن دەگەن ادامنىڭ بويىندا تابيعي ەپتىلىك, قارىمدى قابىلەتپەن قوسا, تەمىردەي ءتوزىم دە بولۋى كەرەك ەكەن.
– شەبەرحانا التى باعىتتا جۇمىس ىستەيدى. نەگىزىنەن 10-20 جاس ارالىعىنداعى جاستار تاربيەلەنۋدە. بيىل ستەند مودەليزمى اتتى جاڭا ۇيىرمە اشىلدى, – دەيدى ۇيىرمە جەتەكشىسى ولجاس احمەتوۆ. – ساباقتار اپتا بويى وتكىزىلەدى. بالالاردىڭ قىزىعۋشىلىعى سونشالىقتى, ءتىپتى دەمالىس كۇندەرى دە باس الماي جۇمىس ىستەي بەرەدى.
ۋاقىت وتكەن سايىن جاس شەبەرلەردىڭ بۇيىمدارى كوركەمدەلىپ كەلەدى. وتكەن World Skills بايقاۋىندا جۇلدەلى ورىنعا يە بولىپتى. شەگە قاعا المايتىن بوزبالا, ينە ساباقتاي المايتىن بويجەتكەن كوبەيگەن زاماندا قولونەر سىرى كوكىرەگىن جىلىتقان, شەبەرلىككە ىنتىزار جاستاردىڭ قاتارىنىڭ كوبەيۋى قۇپتارلىق-اق قادام.
كوكشەتاۋ